No.1009/2021-2022
Lunglei the 17th June, 2021 – Covid-19 hrileng avanga inkharkhip kalpui mek leh hrileng do kawnga hmalaknate leh hmalak tul te sawiho turin vawiin khan Lunglei HPC Vice Chairman Pu Lawmawma Tochhawng leh Bamboo Development Board Vice Chairman Dr K Pachhunga te hovin Lunglei DC Conference Hall-ah meeting neih a ni. He hunah hian Lunglei DLTF member-te, Incident Commander-te, Lunglei District VC Association hruaitute leh Sub Hqrs YMA hruaitute an tel a ni.

HPC Vice Chairman Pu Lawmawma Tochhawng chuan Covid-19 hripui beih let kawngah Sawrkarin theihtawpa hma a lak zel thu sawiin Medical lam, Police leh sawrkar official dangte, VLTF-te, phal taka tanpuina thawhtu mimal, pawl, Kohhrante chungah lawmthu a sawi a. Covid-19 hrileng mekin engtik thleng nge a awh dawn a hriat lohva, mithiam thenkhatin an sawi danin Covid-19 3rd wave la hmachhawn thei dinhmuna kan awm avangin tha thlahlova theihtawp kan chhuah chhunzawm zel a tul a ni tiin kalkhawmte chu tun dinhmuna hmalak tul te meeting ah sawi chhuak turin a sawm a. Lunglei DC Pu Kulothungan A hmalaknaa Lunglei District in CSR kaltlanga medical equipment thahnem tak kan dawng chu lawmawm a tih thu sawiin DC leh a thawhpuite chungah lawmthu a sawi bawk.

Bamboo Development Board Vice Chairman leh Lunglei South bialtu MLA ni bawk Dr K Pachhunga chuan Covid-19 hrileng dona turin health infrastructure leh medical facility-te tih changtlun kawngah sawrkarin hma a la mek zel a ni tiin kar hmasa lawkah Lunglei East leh Lunglei West bialtu MLA ten an MLA Fund atangin Truelab Quattro pahnih Civil Hospital Lungleiah an donate chuan sample test chungchangah hmasawnna tam tak a thlen dawn a ni, a ti. Lunglei Civil Hospitala ‘Laboratory Block’ siam tum chungchangah pawh hmalaknaa kal zel bakah Pukpui Sub Centre hmunah Oxygen Refilling and Distribution Centre ruahman mek anih thu a sawi bawk.

Meeting-ah hian Covid-19 hrileng leh inkharkhip kalpui avanga ei leh bar kawnga harsatna awm thei te leh hemi kawnga hmalak tul te, Covid-19 do kawnga H&FW hnathawktute mamawhte, CCC leh 4C bawlhhlawh sawngbawl dan te, Executive Duty kalpui dan te, dawr inhawn dante leh police duty kalpui dan te chipchair taka sawiho a ni.