Vawiin hian Serchhip DC Pisaah Serchhip District Vidyalaya Management Committee te chuan meeting an nei a, an Chairman, Serchhip Bawrhsap ni bawk Dr. Lalrozama chuan kaihruaiin Serchhip District nu leh pate chu an fate Jawahar Navodaya Vidyalaya, Thenzawla kal tir uar turin a ngen.

Dr. Lalrozama chuan, JNV hi India ram pum huapa naupangte enkawl nana School tha ber te zinga mi a ni a, Serchhip District hian pakhat kan nei a Thenzawlah a awm. Thenzawl JNV ah hian Class 6 atanga Class 12 thleng zir theih niin Class tinah seat 80 vel a awm a, zirna man hi engkim a thlawn vek niin chenchilh School (Residential School) a ni. Thenzawl JNV hian Class 6 ah seat 80 vel nei mah se nikumah khan mi 17 chauhin Entrance Exam an paltlanga, seat hnawhkhah loh a tama a uiawm hle a ni. Hei vang hian Serchhip District chhunga nu leh pa ten kan fate he zirna ina luh tir tuma theihtawp kan chhuah a tul a ni, a ti.

Vawiina Meeting ah hian nakum April ni 8 a Class 6 Entrance Exama Serchhip District zirlai naupang tam zawk an inlan theih dan tur te, awlsam zawka Entrance Exam an paltlang theih nana District Education Officer hmalakna hnuaia Tuition hial neih pui dan tur te, Entrance Exam Centre tam zawk siam dan turte, JNV rintlak zia leh a thatzia zirlai leh nu leh pate hnena uar zawka puan zar dan turte an rel a. Hei bakah hian JNV Complex panna kawng siam that dan tur te, ei tur supply mumal zawka an dawn theih dan tur te leh School Doctor neih dan turte rel a ni.

Jawahar Navodaya Vidyalaya (JNV) hi Ministry of Human Resource Development hnuaia Autonomous Organisation niin India ram puma Class 6 atanga Class 12 inkar zirna in tha ber te zinga mi leh National Standard tling a ni. Zirlai naupang hi an awmna District chhunga mi te zel an ziaklut thin a ni.JNV awmna District tinah hian District Magistrate (DC) Chairman na hnuaiah Vidyalaya Management Committee din vek a ni bawk.

Nakum 2017-18 Academic Session atanga lut thar duhte tan April ni 8, 2017 ah District chhung khaw hrang hrangah Centre siama Entrance Exam buatsaih a ni leh dawn a, he mi atana inbuatsaihna tur Guide Book te, Prospectus te pawh an buatsaih niin JNV Thenzawl, DEO Office, SDEO Office ah te ngaihven theih a ni ang.