No.4221/2020-2021  

Dated Serchhip, the 19^th August, 2020: Vawiin hian Serchhip Bawrhsap Pu Kumar Abhishek, IAS chuan Serchhip District Hospital tlawhin an hmunhma hrang hrangte a fang kual a. Hnathawktute nena inkawm hona te neiin Hospital tihhmasawn dan turte an sawi ho.

Pu Kumar Abhishek chuan, Serchhip Hosipital Building chu a thara sak leh tihlen a tul hle tawh nia a ngaih thu a sawi a. Department in hma a lo lak tawhna chinte zirchianga chak taka bawhzui tha a tih thu a sawi a ni. Tunlaia kan mamawh em em Covid19 enna khawl bunna tur hmunhma buatsaih mek pawh tlawhin thawktute chu chak taka thawk turin a hrilh a ni. Covid enna khawl Truenat Micro PCR hian Serchhip a rawn thleng tawh a, a viltu turte pawh training neih tir tawh a ni a, tunah hian a khawl dahna tur room siam mek a ni a. Harsatna dangin a tlakbuak loh chuan hman tan theih thuai beisei a nih thu Dr. ZD Lalmuanawma, DMS chuan Bawrhsap hi a hrilh a ni. Bawrhsap hian District Hospital hnunga Solar Power Plant inbun, hman theih silohva awm reng pawh chu umzui ran a that thu a sawi a. Thawktute chu a tul ang zela tanpui a inhuam thu a sawi a ni.

Pu Kumar Abhishek hian Hospital OPD zawng zawng bakah Ward zawng zawng leh Clinic hrang hrangte, Laboratory, Operation Theatre, Trauma leh hmun dangte a tlawh kual vek a, Central sawrkar hnuaia hmalakna thenkhat PMJAY (Golden Card) kalpui dan te, RKS (Hospital Management Society) hmalak dan te, a zawhchian bakah A.R.T Centre thar, kumin March thla atanga Serchhip Hospital a kalpui tan hnathawh dan te pawh thawktute a zawtfiah a ni. Tun dinhmunah A.R.T Centre a enkawl lai HIV positive hi mi 161 an awm mek thu leh district pumpuia HIV positive zawng zawng zat chu 204 vel an nih thu thawktute hian an lo hrilh a ni. 

Thawktute hian Nurse indaihlohna an neih nasat thu Bawrhsap hnenah hian an lo thlen a, Nurse awm zawng zawngte chawlh la awm lova an thawh kim thapin zanah Ward zawng zawng vil turin Nurse pathum chauh an awm theih thute, chawhma lamah panga, chawhnu lamah pali chauh an duty theih thu an sawi a. Tunah Covid19 hripui vanga hmun danga inpawh pen loh theih loh lai phei chuan Nurse indaihlohna a san hle thu an lo sawi a ni.

Heng baka an mamawh hrang hrangte pawh Bawrhsap hnenah hian an lo thlen a, Bawrhsap hian a theihna chinah theihtawp chhuahpui zel a tum thu a hrilh hlawm a ni.

Bawrhsap hi Pu Lalmuansanga Ralte, MCS, Addl. DC leh Pu K. Saitluanga, MIS, DIPRO in an tawiawm a, Dr. ZD Lalmuanawma, Medical Superintendent leh Dr. Laldawngliana Sailo, CMO bakah thawktu dangten an lo dawngsawng a ni.