No.4222/2020-2021   

Dated Champhai, the 19^th August, 2020: Tun thla August Ni 27, 2020 a Village Council Election neih tura inpuahchahna chu Champai district-ah chak takin kalpui mek zel a ni a. Tunlai hrileng mek Covid-19 laka mipuite him theihna tur ngaihtuah chungin  inthlan ni a vote thlak dan tur chungchang vawiin khan District Election Officer (DEO) Pi Maria C.T Zuali hovin rel a ni.

Meeting  DC Conference Hall-a neihah hian Champhai District Election Officer Pi Maria C.T Zuali chuan Village Council inthlanna buaipuitu  State Election Commission duhdanin  Covid-19 hrileng laka inkaihhruainate zawm chung zelin  mumal leh awmze nei taka vote thlak anih theihna turin ruahmanna siam  tum anih thu  a sawi a. Covid-19 avangin inthlan tawh dan kalphung hmasate zawm a rem tawh loh thu leh hmalak dan tur ngaihtuah tura meeting koh anih thu sawiin, inthlanna muanawm leh felfai tak neih anih theihna kawnga tangkai tak Mizoram People Forum (MPF) te nena tangkawpa hmalak leh angaih dawn thu a sawi a. Hripui leng laka fihlim turin kan zavaia tanho angai a, Official level atanga mipuite himna tura mamawhte chhawpchhuah tum a ni tiin, MPF leh NGO hruaitute pawh mipuite zirtir leh hrilhhriat kawngah theihtawp chhuah turin a sawm a. Inthlan campaign nana social media kaltlanga inbeihna leh inchirhthehna awm theiahte beng chhi reng tur leh hmalak zelna kawngah thuneitute  tawiawma puibawm tlat thin turin a ngen nghal a ni.

Pu Lalnunfela Chawngthu, Asst. District Election Officer chuan Polling Station tinah Voter hming leh contact number-te register-ah ziakluta vawn zel tum anih thu sawiin, Covid-19 vanga mipuite himna ngaihtuah chung zelin intlar dul dul tur ven nan VC Roll-a serial number ang zela hun bituk siama vote thlak theihna Voter slip semchhuah vek tum anih thu sawiin, ruhmanna siamte chu kan zavaia tana himna tur a ni tih hriaa zawm theuh tum turin voter-te a ngen nghal bawk a ni.

He huna Mizoram People Forum leh YMA hruaitu kalte chuan inthlanna muanawm leh felfai neih anih theihna tur kawnga mipuite zirtir leh vote thlak ni a ruahmanna siam zawm kawnga zirtirnaahte inthlan buaipuitute  tawiawm tlat an tum thu an sawi a ni.

Thukhawm chuan Covid-19 hripui leng mek laka mitinte himna tur ngun takin a ngaihtuah a, inthlan hmain vote neite hnenah Voter’s Slip, VC Roll-a an serial number indawt ang zel leh vote thlak hun tur darkar bituk tarlanna chu sem lawk vek nise , Voter’s Slip chu MPF kaihhruaina hnuaiah semchhuaha inhrilhhriatna neih nghal zel  nise tih a ni a. Vote thlak turte an vote thlak hun tura bituk zelah vote thlak tura beisei an ni a, veng chhung Information Centre leh Whatsapp kaltlangin inhrilhhriatna neih zel tura ruahman a ni a. Vote thlakna hmunah vote thlaktu hming leh biakpawh theihna phone number register a ziah luh zel nise tih niin, MPF te kutah mawhphurhna pek a ni a. Vote thlak ni a mipuite zawm tur leh an himna tura ruhmanna district puma khairual taka hman theih tur Election Office-in duang se mipuite hnenah a zau thei ang bera puanzar nise tih a ni bawk.

Vote thlak hun hi zing dar 7 atanga tlai dar 5 thleng a nih dawn avangin vote thlak theih hun chhung darkar 10 a awm dawn a, vote thlak hunbi  tuka thlak tur serial number ruat te’n an thlak zo hman lo emaw, thlak tur ang te’n hunbi tiam ral hmaa an thlak zo hman anih chuan a tul ang zela ruahmanna siama mipuite hnena hrilhhriat leh zel mai nise tih  a ni a. Mahni vote thlak hun tur bituka vote thlak  hman lote tan ruahmanna siam nise, amaherawhchu vote thlak tur ten an serial number ang zela vote thlak hun bitukah zel vote an thlak theihna tura zirtir leh hrilhhriat kawngah tanlak nise tih a ni bawk.

Vawiin meeting-ah hian Pi Maria C.T Zuali DEO, Pu Rex Zarzoliana Vanchhawng SP, Pu Lalnunfela Chawngthu Asst. DEO, District Election Official-te, District MPF Office Bearers leh Sub-Hqtrs. YMA Office Bearers-te an tel a ni.