4139/2023-2024

Dated Serchhip, the 13th March, 2024: Vawiin khan Serchhip Addl DC Pu James Lalnithanga chuan ni thum awh tur DAY-NULM Festival (Exhibition-cum-Sale) chu Serchhip Bazar (Top Floor) ah a hawng.

Additional DC chuan DAY-NULM Festival buatsaih a ni chu lawmawm a tih thu sawiin hlawhtling taka hun hman a nih theih nan duhsakna a hlan a. DAY-NULM in a tum - rethei zawk ten eizawnna tling an neih theih nan hmanraw tangkai a nih a beisei thu a sawi. Sawrkar laipui atangin scheme chi hrang hrang a lo kal thin a, heng scheme te hi a hlawhtlin theih nan a chhawrtu te leh official te an pawimawh hle, a ti a. Hlawk taka kan hman theih nan a scheme hriatchian a tul a, rinawm leh taimak a ngai a, a huhoa thawh ngai chi ah phei chuan inlungrualna leh inlaichinna tha a pawimawh hle, tih hre turin Addl DC chuan beneficiary te a chah a. Exhibition-cum-Sale hlawk taka an hman theih nan duhsakna a hlan a ni.

UD&PA hian khawpui a cheng chhungkaw harsa ten leirem an rah theih nan kawng hrang hrangin hma a la a. Serchhip District-ah hian Self Help Group 91 an awm a. UD&PA hmalaknaa thiam thil chi hrang hrang training chhuak mi 2057 awm tawhin, an zinga 465 te chu hna hmuhsak tawh an ni. Self Employment programme kaltlangin subsidised loan and pe chhuak a, Support to Urban Street Vendors (SUSV) hnuaiah licence 192 pek chhuah a ni tawh bawk.

Vawiina hawn tak DAY-NULM Festival ah hian stall 20 a awm a. UD&PA hnuaia thiamthil zirchhuak te leh Self Help Group te siam chhuah thil chi hrang hrang phochhuah a ni a, a duh apiang tan lei theih a ni. He Festival hian March 15 (Zirtawpni) thleng a awh dawn a. Zing dar 10 atanga tlai dar 5 bawr vel thleng hawn thin a ni ang.

Serchhip ah hian DAY-NULM Festival hi nikum atangin neih tan a ni a. Nikum Festival ah khan cheng nuai 2.40 man hu vel hralh chhuah a ni.

Festival hawnna program hi chawhma dar 11 khan neih a ni a. District Urban Development Officer Pu Gaston Vanlalhriatpuia’n programme a kaihruai a, beneficiary te aiawhin mi pahnihin thu an sawi a ni.