Vawiin chawhma dar 10 khan Agriculture Conference Hall Serchhipah Agriculture leh Irrigation a hmasawnna kawnga chak zawk leh hlawk zawka hma lak anih theih dan tur Technical Cooperation Project (TCP) chungchang sawi hovin Serchhip Block Agriculture & Irrigation Development Committee (BAIDC) te an thukhawm.

Technical Cooperation Project (TCP) hi Mizoramin ei leh bara kan intodelh theih nana JICA (Japan International Cooperation Agency) in master plan a lo siam tawh tihhlawhtlinna atana hmalakna a ni a. Ni 26 October, 2016 khan he hmalakna atan hian inremna neih a ni tawh a ni. He Project hi kum nga chhung (July 2017 – June 2022) awh tur niin a tum ber pakhat chu ei leh bara hmasawnna nasa zawk a awm theih nana Japan thiamna Mizoram sawrkar hnathawkte hnena hlanchhawn a ni. He ruahmanna bul tan nan hian Mizorama RD Block pali- Bilkhawthlir (Kolasib District), Aibawk (Aizawl District), Serchhip (Serchhip District) leh Champhai (Champhai District) te chu Pilot Project atana thlan niin; heng block tinah te hian Block Agriculture & Irrigation Development Committee (BAIDC) din ani.

Vawiina meeting ah hian Pu Yamaoka, Chief Advisor JICA chuan Serchhip Block tana plan an siam dan leh a bawhzui dan an ruahman te, Block Agriculture & Irrigation Development Committee (BAIDC) hmalak dan turte sawiin a lem nen a sawifiah a, member ten an hriatchian duhte zawhna hun an hmang nghal bawk. Hemi hnu hian Chhiahtlanga Loneitute chu an hnathawhna hmuna kal chilhin an hnathawh dan te an enpui nghal a ni.

He hun hi Pu Laldingliana Hrahsel, Executive Engineer, Irrigation & Water Resource Department, Aizawl chuan a kaihruai a, Pu Lalzuitluanga, SDO, I&WRD, Serchhip chuan BAIDA hnuaia ruahmanna awm dan leh a umzui dan tur tlangpui a sawifiah a, Serchhip I&WRD hmunah JICA office tur an ruahman sak thu a tarlang bawk.

He hunah hian Serchhip BAIDA member te an kal tha hle a ni.