2971/2024-2025

Dated Serchhip, the 13^th November, 2024: Vawiin khan Serchhip DC Pu Pual L.Khuma chuan “Trainers training for school teachers on drug prevention”-  ruihhlo dona kawnga naupangte zirtirtu tur school teacher te tana training buatsaih chu Serchhip DC Pisapui Hall ah a hawng.

Serchhip DC Pu Paul L.Khuma chuan ruihhlo dona hi a khawnawta kalpui a ngai tawh a, social movement anga kalpui a tul takzet tawh a ni, a ti. Mizoram thalaite zingah ruihhlo a hluar a, a tithar an pung a, a tithin te an naupang telh telh ta mai chu a manganthlak tak zet a ni, a ti a. Sawrkar laipuiin ruihhlo dona scheme a siam te, Mizoram Sawrkarin Task Force a siam te, police leh Excise Department te hmalakna chauh hi a tawk zo tawh lo tih sawiin kohhranah te, sunday school-ah te, zirna in zawng zawngah te tihtak zet a tan lak a tul a ni, DC chuan a ti.

Mizoram Chief Minister Pu Lalduhoma hmalaknain a bial Serchhipah nasa taka ruihhlo do hi kalpui mek a ni a.  Serchhipah School 25 thlang chhuakin ruihhlo dona atana an hman tur cheng 10,000 pek an ni a. Vawiin programme ah hian DC chuan a semchhuak a ni. School 25 thlan chhuah atang hian zirtirtu pahnih theuh tel tura sawm niin ruihhlo dona chungchangah training pek an ni a. Anni hian an school theuhah an zirtir ve leh chhawng dawn a ni.

Vawin programme hi Serchhip SDEO Pi Melody L. Betlu chuan a kaihruai a. Social Welfare and Tribal Affairs Department atangin Pi Lalfakawmi’n thu a sawi a. Dr Marilyn Lalruatkimi chuan lawmthu sawiin hun hnung a khar a ni.

Vawiin training ah hian Middle School atanga Higher Secondary School zirtirtute an tel a ni.