2970/2024-2025

2024 Sahmulphah thla ni 13: Vawiin khan Lunglei DC Conference Hall-ah mipuite khawsak chawi kan nana Mizoram sawrkar ruahmanna thar, Mizoram Bana Kaih (Handholding) Scheme hnuaia sawrkarin an bana a kaih tur leh hma a lakpui tur, progress partner thlan, puihbawmna leh kaihhruaina pek leh vil zui kawnga department-te mawhphurhna zir hona, 'sensitisation programme' buatsaih a ni.

He hun hi Lunglei District Bawrhsap Pu R. Lalṭhazuala chuan kaihruaiin, kal khawmte lawmna thu a sawi a. Bana Kaih chu Mizoram sawrkar ruahmanna pawimawh tak a nih angin hlawhtling taka kalpui a nih theih nan kal khawmte chu ngaihtuahna seng tlang tura chahin, training chu hlawk taka hmang turin duhsakna a hlan a. Line department-te kutah thuneihna leh mawhphurhna lian tak a awm tih sawiin, ṭhahnemngai taka thawk turin a chah a ni. 


He hunah hian ZIDCO Managing Director & Mizoram State Policy Coordination Committee (MSPCC) Member Pu LP Lalchangkima'n Handholding Policy hnuaia progress partner-te hma lakpuina tur ruahmanna leh hriat tur pawimawh hrang hrang a sawi fiah a. Bana Kaih chu Mizoram sawrkarin tih tak taka kalpui a tum tih sawiin, Mizoram siamna tur a nih angin department, bank leh mipuite ṭan rual a pawimawh thu a sawi a. Bank-te tan pawh anmahni dawr zui thei tur customer ṭha an hipna leh an chher chhuah theihna remchang tak a nih thu sawiin, theih tawp chhuah turin a chah a. Hma lakpui tur progress partner thlangtu department-te chu a ti tak tak tur chauh thlan chhuah an nih theih nan fimkhur tura chahin, Bana Kaih hma lakna chu hna peng ni lovin, hnapui a ni tih hre tur te, an thlan chhuahte ṭha taka um zui a, an hlawhtlin ngei theih nana theih tawpa hma lakpui tur te'n a chah a ni.

He sensitisation programme-ah hian Lunglei District Agricultural Marketing Committee (DAMC) member-te, Bana Kaih ruahmanna kalpuitu sawrkar department hrang hrang official-te, bank hrang hrang ai awhte, tlawmngai pawl hrang hrang leh political party ai awhte an tel a. Zawhna leh chhanna leh sawi hona hun hlawk tak hman a ni bawk.

Attachment

  • Loading attachment...