2969/2024-2025

Dated Serchhip, the 13^th November, 2024: Vawiin khan Serchhip DC Pu Paul L.Khuma chuan official dangte nen Serchhip khawpui chhung lun lai dawr hrang hrang an tlawh kual a, hmankhat daih single-use plastic an zawrh leh zawrh loh an enfiah.

DC leh amah tawiawmtute hian vawiin khan hman khat daih plastic, polythene engemawzat dawra an zawrh laite chu zawrh phalloh a nih thute hrilhfiahin zuar chhunzawm lo turin an hrilh a. Environment tichhetu a nih avangin sawrkarin khapna dan khauh tak a siam thute an hrilhfiah a ni.

Plastic Waste Management (Amendment) Rules, 2021 bawhzuia Mizoram sawrkarin November ni 5, 2021-a thuchhuah a siam atangin plastic thenkhat (SUPs) hman, lakluh leh zawrh khap a ni a. He khapna thuchhuah zawm lote chu Environment (Protection) Act, 1986 hnuaia section 15-na tlawhchhanin kum 5 thleng lung in tan emaw, cheng nuai 1 chawi emaw, a pahnih hmanga hrem theih an ni a, thupek zawm lova bawhchhe chhunzawm zel chu nitin cheng 5000 chawitir theih an ni.

Vawiin endikna hunah hian Team Leader District Bawrhsap Pu Paul L.Khumah bakah DUDO Pu Gaston Vanlalhriatpuia, SDC Dr Marilyn Lalruatkimi bakah official dangte an tel a ni.