2968/2024-2025

Dated Serchhip, the 13^th November, 2024: Vawiin khan District Level  Authority on The Mizoram Government Land Pooling & Management Scheme chu an Chairman Pu Paul L.Khuma, Serchhip DC hoin Serchhip DC Meeting Hall ah an thukhawm. He thutkhawmah hian Serchhip District chhunga Head of Office zawng zawngte an tel a ni.

Serchhip DC chuan Land Pooling Committee nih phung sawifiahin State-ah leh District chhungah Department hrang hrangte leh Office-in ram an neihte chu sawrkar leh mipui tana tangkai lehzual zawka hman a nih theih nan leh a riral lohna tura din a nih thu a sawi a. Serchhip District-ah pawh office hrang hrang ten mahni office ram leh hmunhma an neih te chu District Land Pooling Committee remtihna tel loa mi mal emaw pawl emaw tana sahthlak a remchan loh thu te a sawifiah a ni.

Vawiin meeting-ah hian PHE Department-in tui dahkhawlna water tank siamna tur ram an dil chungchang sawiho a ni a. Social Welfare, Tribal Affairs, Women & Child Development Department-ten Serchhip khawpui lun laia office sakna tur ram an dil chungchang ngaihtuah a ni bawk a. Committee chuan State Level Authority ah thlen ni se tiin an rel a ni.

Land Pooling and Management Scheme hi September ni 14, 2018 khan Mizoram Sawrkar General Administration Department chuan notification a lo tichhuak tawh a. November ni 11, 2019 ah tlema siam remin notification a tichhuak leh a. He dan hmang hian sawrkar department hrang hrang ram neih te chu chhunkhawm (pool) in General Administration Department chuan mumal leh tangkai zawka hman theih turin a enkawl a ni.