4316/2025-2026 

Dated Serchhip, the 5th February, 2026 : Vawiin khan District Level Committee on Fire Prevention chu Serchhip DC Pisapui Hall-ah an Chairman Pu Paul L Khuma, Serchhip DC hoin an thukawm a. Fire Prevention Week 2026 hman dan tur an rel.

State Level Committee on Fire Prevention, 2026 thutkhawmin an lo rel tawh angin Fire Prevention Week chu February ni 9 atanga 13 chhung neih tur a ni a. Serchhip District-ah a hawnna inkhawm chu February ni 11, chawhma dar 11ah Serchhip DC Pisapui Hall-ah neih ni se, DC Pu Paul L.Khuma chu he hunah hian khuallian ni se tiin an rel a ni.

March ni 15 ral hmaa lo hal vek tura State Level Committee-in a lo rel tawh te, meikawng sial tura hriattirna te leh kangmei laka invenhimna tha zawk a awm theih nan mipuite hnena ngenna leh hriattirna chu DC in a tichhuak dawn a. Fire Prevention chungchanga awareness campaign chu awmze nei zawka neih a nih theih nan Environment Forest & Climate Changte Department te kaihhruaina hnuaiah school zirlai te leh loneitute zirtirna ngawrh leh zuala pek ni se, an ti a. Social media kaltlangin e-flyer thehdarh a ni dawn a. Banner leh poster te hmun pawimawhah tarchhuakin kangmei ven pawimawhzia inzirtir a ni ang. Serchhip District khaw puma YMA chanchinbute chu Fire Prevention Week denchhen hian inelna neih tir tura ruahman a ni a. Rural Development & Administration Department te chuan February thlaa Ni 100 inhlawhna lo chhuah hunah kangmei ven inzirtirna uar takin mipui zingah an kalpui dawn bawk a ni.

Serchhip District chhunga kangmei ven kawnga hma la tha khuate hnenah lawmman siam a ni leh dawn a. A endik turin EF&CC Department lamin Sub Headquarters YMA te an thawhpui ang. Kumin hian kangmei ven kawnga titha khuate inelnaa lawmman dawn tur sumfai tihpun a nih dawn bakah District tina titha lawmman pakhatna dawngtute chu Mizoram pum huap inelnaah an tel chhunzawm dawn a. District hrang hrangte inelna pawh neih chhunzawm tur niin lawmman sumfai inpek thin erawh kuminah hian a awm dawn lo a ni.

Vawiin thutkhawmah hian Environment Forests and Climate Change Department hotute, sawrkar official dang te leh tlawmngai pawl te an tel a ni.