645/2025-2026

Dated Serchhip, the 16^th May, 2025: Vawiin khan Mizoram State Legal Services Authority leh All Mizoram Elected Women Representative te tangkawp buatsaihin New Serchhip YMA Hall-ah Serchhip District chhunga mipui thlan Elected Women Representative te tan ‘Special Campaign on Scheme of National Legal Services Authority (NLSA) & Capacity Building & Leadership Training’ neih a ni.

He hun hi Serchhip District Bawrhsap Pu Paul L. Khuma chuan khuallian nia hmanpuiin hmanlai hun kan thlir chuan raldo thin leh ramchhuak thin kan nih avangin mipa te pawimawhna a sangin, In lam leh khawtlang rorelnaah pawh hmeichhia te an lang thei mang thin lo tih a sawi a. Amaherawhchu tunah chuan khatiang hun kha liam tawhin, kan hmasawnna leh changkanna avangin a thluak tha, thil hrethiam leh man thiam te tan dinchhuahna kawng a inhawng zau a, hmeichhia te tan pawh dinhmun sang tak tak chelh theihna kawng zau tak a inhawng tawh tih a sawi a. Chutihrual chuan khawtlang hruaitu leh roreltu atana thlantlin te chu kan mawhphurhna hlenchhuak tura keimahni kan inbuatsaih thar ve a tul thu leh hmasawn an tum a tul thu a sawi a. He huna an thil zir hrang hrangte chu tangkai taka an hman theihna turin an thil zir te uluk taka ngaithla tur leh hlawk taka he hun hi hmang tura a duhsak thu a sawi bawk a ni.

Vawiin-a he hun hman hi R. Zomuanpuii, President All Mizoram Elected Women Representatives chuan kaihruaiin inlawmna thu a sawi a. An pawl chu Mizoram puma mipui aiawha thlantlin hmeichhiate pawl a ni tih sawiin, vawiin-a programme an buatsaih ang hi Mizoram hmun hrang hrangah buatsaih an tum thu a sawi a. Serchhip hi Aizawl pawn lama hun an buatsaih hmasak ber a nih thu a sawi a. Ani bakah hian Josangzeli Tlau MJS, Civil Judge-cum-Judicial Magistrate First Class, Serchhip pawhin thu a sawi bawk.

Vawiina he hun hman ah hian chawhnu lamah Technical Session hun hmangin Dr. David Lalawmpuia, Advocate; Pu Lalvensanga, District Mission Coordinator, Hub for Empowerment of Women; Inspr. R. Lalbiakhlua, OC Serchhip Police Station leh Pu Vanlalhruaia Ralte, Head Faculty, DPRC Serchhip ten thupui hrang hrang hmangin Hmeichhia te tana Dan hriat tur pawimawh te, Dan leh thupek kenkawh kawnga an hriat tur te, Mission Shakti chungchang te leh khawtlang rorelna a thlantlin Hmeichhia te tana hriat tur leh an mawhphurhna te an sawi a, zawhna leh chhanna hun hman nghal a ni bawk a. Pi Lalremsangi Fanai, Financial Secretary, All Mizoram Elected Women Representative chuan lawmthu sawiin he hun hi a khar a ni.