646/2025-2026

Dated Serchhip, the 16^th May, 2025: Vawiin khan Minister Pu PC Vanlalruata, Tuikum bialtu MLA ni bawk chuan Govt Chhiahtlang Higher Secondary School (LS) ah HSSLC pass tharte lawmpuina hun a hmanpui.

Khuallian chuan zirna hi mi puitlinga min siamtu, khaw eng min hmuh tir tu a ni, a ti a. Chhiahtlang Higher Secondary School zirlai ten hlawhtlinna ropui tak an chang a, zirlai zaah za an pass thei chu zirtirtu, zirlai te, nu leh pa te leh khawtlang mipui thahnemngaihna vang a ni, a ti. School changtlun zelna turah Managing Board te leh zirtirtute an tang em em a, bialtu MLA a nih ang pawhin tihtur tam tak a neih thu leh Managing Board te nena thawhhona tha an neih zel a beisei thu a sawi a. Zirlai hlawhtlinna chang thar te duhsakna hlanin, exam hmachhawn leh tur te theihtawp chhuah turin a fuih a ni.

Kumin HSSLC result chhukah khan Govt Chhiahtlang Higher Secondary School (LS) atang hian zirlai 26 in exam an hmachhawna. An zavaiin hlawhtlinna changin 100% an pass a. Distinction-ah zirlai 1, First Division ah zirlai 1, Second Division ah zirlai 9, Third Division-ah zirlai 15 an pass a ni.

Govt Chhiahtlang Higher Secondary School (LS) hi kum 2014 ah din a ni a. Board exam vawi 11 an hmachhawn tawhah vawi 9 zet 100% pass percentage an nei a ni.

Vawiin programme hi Managing Board Committee Treasurer Pu RC Lalhruaitluanga’n a kaihruai a. Principal Pi Lalawmpuii Ralte leh Managing Board Chairman Pu H Lalrawngbawla te chuan report a pe a ni.