647/2025-2026

Lunglei, 2025 Ṭomir thla ni 16: Vawiin khan Mizoram Public Health Engineering Department (PHED) leh Young Mizo Association (YMA), Lunglei Sub-Headquarters ṭang kawp huaihawtin Lungleia Sub-Headquarters YMA Conference Hall-ah Tlawng lui humhalh inzirtirna, 'Awareness on Tlawng Protection at Lunglei' buatsaih a ni.

He hun hmanpuitu leh resource person ni bawk, Mizoram PHED Engineer-in-Chief Er H. Duhkima chuan mihring nunna atana hlu ber pakhat chu tui a nih thu leh Pathian thil rel danin mihringte'n khawvel kan enkawl em tih chu chhut chian a ṭul thu sawiin, sik leh sa leh tui chungchanga kan harsatna tam tak chu mihringin kan insiam chawp leh ven theih a nih thu a sawi a. Tui hna kang chat leh tui harsa chho zelah nawmchenna tur lirthei leh thil dang aia tui dah khawlna leh ruah tui khawlna ṭha ngaih pawimawh nachang hriat a hun tawh tih sawiin, tui renchem leh tui hna tipung tura hma lak chu tih makmawh a nih thu a sawi a. Tlawng lui chu Lunglei khawpui chauh ni lo, Aizawl leh khaw dang tam takin an tlan avangin a pawimawhzia hriaa humhalh tura ṭan lak thar a ṭul tak zet tih sawiin, Lunglei chu Tlawng hnara awm a nih angin, Zoram mipuite'n, "Lunglei khawpui chuan Tlawng hnar an tihring leh ta," an tih tura hma la thar turin Lunglei mipuite a chah a. Tlawng lui dinhmun leh tuihna a tlem zel chhan kawng hrangte tar langin, tuihna tipung tura ram hman dan felfai zawk siam a ṭul thu leh Tlawng lui humhalha tui hna tipung leh tura hma lak dan tur kawng hrang hrangte powerpoint presentation hmangin a tar lang a ni.

He hunah hian Lunglei khawpui chhunga YMA branch hrang hrangte bakah, Tlawng lui hnar lama awm YMA branch ai awhte telin, Lunglei Sub-Headquarters YMA Vice President Pu CMS Dawngliana chuan hun a kaihruai a. Sub-Headquarters YMA President Pu K. Lalfakzuala chuan YMA leh PHED-in thawh hona thuthlung ṭha tak an neih thu sawiin, tuihna humhalh tur te, tui hna tipung tur leh lui tuite a lo thianghlim zawk nan tea thawk ho an nih thu leh lui dung then fai hna pawh an thawh ho fo tawh thu a sawi a. Thing leh mau tihchereu nasat avang leh leilung sawngbawl danin a zir loh avang te, thlawhhma leh huan siam dan dik loh avang te leh chhan hrang hrang avangin Tlawng lui leh Mizorama luite a kang chat mek tih sawiin, tui hna tipung leh turin thing phun leh ramngaw humhalh chu mi tin tih theih a nih thu a sawi.

Vawiina Tlawng lui humhalh inzirtirna hunah hian kal khawmte'n zawhna hrang hrang zawtin, PHED lama mi thiamte'n zawhnate hi an chhang a. Sawi hona hun hman ni bawkin, PHED Lunglei WATSAN Circle-a Superintending Engineer Er K. Zohmingliana'n lawm thu sawiin hun a khar a ni.