3296/2024-2025

Dated Serchhip, the 29^th November, 2024: Vawiin khan Serchhip DC Pu Paul L. Khuma kaihhruaina hnuaiah National Highway -54 zauh leh cheithat hna thawktu contractor te nen meeting neih a ni.

Vawiin meeting ah hian Serchhip District huamchhunga National Highway-54 zauh leh cheithat hna package 1, 2 leh 3 a thawktu contractor zawng zawng te Serchhip Bawrhsap chuan a ko khawm a. Kumin chhunga an hnathawh te thlir letna hun an hmang a ni.

Pu Paul L. Khuma chuan kumin atana National Highway chungchang sawihona meeting hnuhnung ber a nih thu a sawi a. Thawhhona tha tak an neih thin avanga lawmthu sawiin, mipui tana rawngbawltu an ni tih hria a, an hna te tha taka thawk chhunzawm zel turin a fuih a ni.

Vawiin meeting ah hian NH-54 cheithat meka an hmalak tawh dan te thlir letna hun an hmang a. Fur ruahsur nasa avanga harsatna an tawh te contractor te hian an sawi a. District Adminstration in thawk tura a bituk an thawk kim em tih te thlir ho niin an hmachhawp thenkhat zinga an la zawh fel loh awm te chu hun bi mumal taka tukin, zo hman ngei tura beisei an nih thu Bawrhsap hian thawktute a hrilh a ni.

Vawiin meeting ah hian Additional DC Pu Lalrinzuala, SDO (Sadar) Pi F.Lalnisai, SDC Dr C Vanlalchhanhimi leh official dangte bakah NHIDCL hnuaia contractor te an tel a ni.