3297/2024-2025

Aizawl, the 29th November, 2024: Sawrkar laipui Ministry of MSME hnuai MSME Development & Facilitation Office, Aizawl leh Mizoram Sawrkar Commerce & Industries tangkawp buatsaih November ni 28-30, 2024 thleng awh tur, PM Vishwakarma Scheme hamthatna dawngtute puala Exhibition-cum-Trade Fair, AR Ground, Aizawla buatsaih chu vawiin tlai khan Mizoram Governor Dr. Hari Babu Kambhampati chuan a tlawh a, Official leh PM Vishwakarma Scheme hamthatna dawngtute a kawm. 

Governor chuan PM Vishwakarma Scheme Mizorama kalpui dan hre chiang tura exibition-cum-trade fair tlawh a nih thu sawiin, hemi kaihhnawih hmalatu hrang hrangte chu PM Vishwakarma Scheme a nihna tur ang taka kalpui a nih theih nan leh a chhawr tangkai tur te'n an tangkaipui theih nana theihtawp chhuah turin a chah a, he scheme hian kutthemthiamna neite an mahni kutke hmanga dinchhuah tir a tum a ni, a ti a. Beneficiary-te tana tanpuina sum leh hmanraw mamawh pekte, thimthil zirtir bakah a hralhna thlenga ngaihven pui turin a chah a. Trade hrang hrang zingah Mizoram leh a chengte mil leh theihna zawnte ngaihtuah tel turin thawktute a chah a, Banker-te chu a taka thawkte loan pe hreh lo turin a chah a, PM Vishwakarma Scheme-in a huam phak lohte pawh Mudra Scheme, cheng nuai 10 thlenga lak theih hnuaia rinluh dan ngaihtuah pui turin a chah a ni. 

He huna tarlan a nih danin vawiin thlengin Mizoramah PM Vishwakarma Scheme dilna lut 10742 awmin, heng zinga 2609 te chuan selection stage 3 an paltlang tawh a, a dangte pawh buaipui mek zel a ni. Carpentry trade bikah training kalpui tawh niin mi 194 te'n training an zo a, loan diltu 59 zinga mi 4 te hnenah loan pek chhuah tawh a ni. 

PM Vishwakarma Exhibition-cum-Trade Fair-ah hian dawr 50 chuang hawn a ni a. Heng bakah hian Bank, National Small Industries Corporation, KVI Commission, GeM, RDSDE leh adangte an inhawn bakah, PM Vishwakarma Scheme-a inziaklut duh tan Common Service Centre hawn a ni bawk. 

PM Vishwakarma Scheme hian kut themthiamte'n an thiamna hmanga eizawnna ngêlnghet an neih theih nan hma a laksak thin a. Kutthemthiamna lam hawi Trade hrang hrang 18 a awm a. Training zote chu honorarium Rs 3,000 leh hmanraw leina tur Rs 15,000 pek an ni dawn a, dahkham awm loin loan Rs 3,00,000 thleng lak theih a ni bawk. Basic training zo te'n loan Rs 1,00,000 an la thei a, an rulh that a, advance training an zawh leh chuan loan Rs 2,00,000 an puk leh thei a, 5% in a pung a ni.