2253/2023-2024

Dated Serchhip, the 10th October, 2023: Vawiin khan Serchhip District Election Officer Pu David Lalthantluanga, Serchhip DC hovin Serchhip DC Meeting Room ah MLA inthlanpui lo awm tura candidate te leh political party te sum hman dan chhinchhiah dan tur leh, candidate ten nomination an file huna tihtur pawimawh te, political advertisement leh media kaihhnawih thil pawimawh inhrilhhriatna hun buatsaih a ni.

Election Commission of India chuan inthlanna fel leh thianghlim a awm theihna tura dan leh inkaihhruaina a siam zingah Expenditure Monitoring hi a pawimawh ber te zinga mi a nih thu DC Pu David Lalthantluanga chuan a sawi a. Tun inthlanah hian candidate tin ten cheng nuai 28 aia tam an hmang tur a ni lo tia ECI in a bithliah tawh angin uluk takin candidate te sum hman dan sawrkarin a vil dawn a, state pawn atangin a viltu tur bik ECI in a ruat Expenditure Observer te an lo kal dawn tih sawiin candidate ten an sum hman te uluk taka an chhinchhiah felfai a tul hle dawn a ni, a ti.

Vawiinah hian Expenditure Monitoring changtu Nodal Officer Pu James Lalnithanga, Deputy DEO leh Media Certification and Monitoring Committee (MCMC) Member Secretary Pi Lalnunmawii, DIPRO ten hriat tur pawimawh an sawi a. Rate Notification hi vawiin khan party aiawh te hnenah semchhuah nghal a ni a. Rate Notification mil hian candidate tin ten account an vawng fel a nga. Expenditure Monitoring team in hei hi an vil zui reng dawn bawk a ni.

MCMC chungchangah electronic media - TV/Radio leh social media (facebook, whatsapp, instagram, X, Youtube leh a dangte) kaltlanga video, audio, flyer, poster etc hmanga political advertisement zawng zawng pre certify hmasak a tul thu leh a dil dan tur kalhmang te inhrilhfiah a ni a. Inthlan puan a nih atanga a zawhfel thlenga media te tih tur pawimawh hrang hrang te sawifiah a ni bawk.

Serchhip AC a ARO Pi Rebecca Laldinmawii Hrahsel, SDO (Sadar) chuan nomination file dan tur leh file dawna thil pawimawh hrang hrang kimchang takin kalkhawm te a hrilhfiah a. Agent inruat dan te, form fill up dan tur te sawifiahin form pawimawh te hi semchhuah nghal a ni bawk.