2252/2023-2024

Aizawl the 10th October, 2023 : Vawiin khan Darlawn Town Hall Chhim vengah Mizoram Govt. Adhoc Aided Higher Secondary School Lecturers' Association (MIGAAHSSLA) buatsaihin Higher Secondary School Provincialised lawmna neih a ni a. School Education Department Director Pu Lalsangliana MCS-in khuallian niin a hmanpui.

 Pu Lalsangliana Director chuan he hunah hian thusawiin Mizoram sorkarin Middle school, High School leh Higher secondary school an vaiin school 180 zet sorkar sikula hlangkai tura ngaihtuahna a sen hian hripui avanga sum harsatna karah thutlukna hautak leh harsa ber a siam a ni a ti a, he thutlukna hi Mizoram chanchinah pawh a ropui hle a ni a ti. School dinhmun chawikan hi hna hautak, ngaihtuahna ril tak senga thawh a nih dan te a sawi a, school 180 a thawk mi 1422 te, sorkar hnathawk ngai reng reng lo te chu sorkar hnathawkah sengluh an ni ta a ni a ti.

Director chuan school dinhmun chawikan hian zirna țha siam kawngah rah țha tak a a chhuah a beisei thu sawiin Board Exam-ah pawh result țha an chhuah a beisei thu a sawi a. Thingtlanga thawk lecturer te chu khawpuia insawn dil lo turin a chah a, thingtlang zirlaite hian lehkha thiam hi an chanvo a ni a, chumi pek chu zirtirtute mawhphurh a ni tih sawiin an thawhna țheuha nghet turin a chah.

Pu Lalsangliana Director chuan zirlai kalkhawm te pawh fuihin hma lam hun thlir a inbuatsaih tur te, hlawhchham chang an neih pawha beidawng lo tur te, retheihna leh harsatna te pawh inbawhbehtir lo turin a fuih bawk.

Provincialised lawmnaah hian an member thi ta te sunna hun an hmang a, HSS Principal te provincialised avanga an dinhmun kiantute chawimawina hun an hmang bawk.  Dr David B.Lalhruaitluanga President MIGAAHSSLA leh Pu Lalzirliana Chairman MIGASTU ten  sawrkarin sikul a provincialised avanga an lawmthu an sawi bawk.

Tun hnaia Mizoram sorkarin Adhoc Aided Higher Secondary School 12  provincialised dinhmuna a hlankaite hi - Public HSS Ramhlun Venglai, Durtlang, Darlawn, Zohmun, Ngopa, Cherhlun, Thingsai, Khawzawl, Biate, Kawnpui, N.Vanlaiphai leh Thenzawl HSS te an ni a, heng school-ah te hian lecturers 170 an awm a ni.

Higher Secondary School provincialised lawmna Darlawn Town hall-ah hian HSS provincialised thar 12 a lecturer te an kalkhawm a, Darlawn HSS zirlaite, Darlawn khaw chhunga khawtlang hruaitute leh political party hruaitu țhenkhatte an tel a ni.