1614/2026-2027

Dated Serchhip, 31^st July 2026: Vawiin khan Serchhip District Deputy Commissioner Pu Paul L. Khuma hovin Serchhip Kawlri Tlanga Cultural Heritage Centre sak mek chungchangah Meeting neih a ni a. Meeting zawhah hian Serchhip District MJA hruaitute, YMA te leh Heritage Society te bakah Department mite nen a hmunah kalin endikna neih nghal a ni.

Bawrhsap Pu Paul L. Khuma chuan he Project hi Chief Minister pawhin a ngaih pawimawh em em a nih thu sawiin, PWD leh Department lamte chuan an tih tur chinte tha taka an tih tawh thu a sawi a, a sak puitlin hna thawk tura rawih Contractor-te chu, theihtawp chhuaha hna thawk turin a chah a ni. 

MJA ten hna thawh zawh har a nih chhan leh zawhna hrang hrangte zawt bawkin, hun tiam chhunga thawk zo ngei turin Contractor chu an duh thu an sawi bawk.

Ruahman dan chuan he Project hi kumin February thla-a zawh fel tur a ni a, hnathawktute hian an thawh zawh hman loh avangin December 2026 thleng hun pawh sei sak an ni.

Tun dinhmunah za zela 82% vel zawh tawh a ni a. Tui chhekkhawlna Rainwater Harvesting and Domestic Water Tank (144000 Litres) leh Overhead Water Tank (10000 Litres) te chu 100% zawh a ni tawh a. Cottage Building paruk (6 Nos.), Lal In Building, Quarter Building, leh Zawlbuk Building te chu 98% thleng thawh tawh a ni a, Capacity Building hna pawh 95% zawh a ni tawh bawk. Hemi bakah hian Site Development hna chu 60% zawh tawh niin, Cultural Heritage Building leh Ethno-Medicinal Garden siam hnate chu 50% thawh zawh tawh a ni a; Approach Road and Side Drain hna chu 30% thawh tawh niin, Children Park and Mini Sport Complex hna chu 20% thawh a ni bawk.

Kawlri Tlanga Cultural Heritage Centre sak mek hi Serchhip bialtu MLA, Mizoram Chief Minister Pu Lalduhoma hmalaknaa sak niin, North Eastern Council (NEC) atangin he hna thawh nan hian cheng nuai 431 (₹4.31 crore) hmuh a ni a; September 2024 khan hna thawh tan niin Public Works Department (PWD) hnuaiah Excell Consultancy Services-ten hna hi an thawk a ni.