1615/2026-2027

Kolasib, 31st July, 2026: Vawiin khan Sub-Divisional Magistrate (SDM), Kolasib leh Mizoram Public Demand Recovery Act (MPDRA) hnuaia Kolasib District-a Certificate Authority ni bawk, Pu H. Lalramliana hovin Kolasib khawpui chhunga bank branch hrang hrang aiawhte chu MPDRA hmang tangkai zawka hma an lak theih dan tur sawihoin an thukhawm.

Thutkhawm kaihruaitu Pu H. Lalramliana chuan thu sawiin, mipuite eizawnna atana bank-in theih tawpa loan a pek chhuah thin laiin, a rulh nachang hre lo leh pe tha duh lo tam tak an awm avangin bank ten sum leh paiah chhiatna leh harsatna an tawk nasa thin hle a ni, a ti. Chuvang chuan, heng ba rul duh lote laka dan anga hma an lak theih nan MPDRA Act chu hmang tangkai thiam turin bank aiawhte chu a chah a ni.

Chutih rualin Certificate Authority chuan, batute zingah pawh mi harsa tak tak, rulhna tur nei thlawt lo, dinhmun khirh tak vanga harsatna tawk an awm ve bawk avangin, chutiang mite dinhmun chu uluk taka lo zirchian a pawimawh thu a sawi a. Heng mi harsa zualte hian zangkhai zawka an ba an rulh theih dan tur leh awlsam zawka an tlak theih dan tur ruahmanna  ngaihtuahpui thiam turin bank hotute chu a ngen nghal bawk a ni.

He thutkhawmah hian tarlan a nih danin, MPDRA hnuaiah hian kumin April leh May thla chhung khan loan la, rul lo case 179 zet chu thehluh niin hlawhtling taka chinfel a ni tawh a. Tun dinhmunah hian ba rul tha lo mi 52 te chu thuneitute hmaah an ba an rulh theih loh chhan insawifiah tura koh mek an ni bawk.