1616/2026-2027 

Aizawl, the 31st of July, 2026: Vawiin chawhnu dar 1:30 khan Pu Lalnghinglova Hmar, Minister of State (i/c), Tourism Department hovin MINECO, Aizawl a a office chamber-ah Tourism Department Review Meeting neih a ni a. Tourism Department hmalakna hrang hrangte thlirho in hmachhawpte sawiho a ni.

Tourism Minister Pu Lalnghinglova Hmar chuan, "Mizoramah hian eng sector hi nge thang thei ber tih ngun takin thlir ta ila, Tourism hi thang thei ber leh sum leh pai thawkchhuak thei ber turah ka ngai. Amaherawhchu Tourism Department hi hunrei tak department lian ni lova ngaih a ni lo tawh a, hei hi vawi leh khatah tidanglam nghal vek thei dawn lo mah ila theihtawp kan chhuah zel ang. Hemi kawngah hian awareness leh publicity lamah multimedia campaign nen nasa zawka hma kan lak pawh a ngai." a ti a. Mizoram sorkar hnuaiah Tourism chu hlawhtlinna tak tak awm theihna tur tak a nih thu a sawi.

Vawiina Department Review Meeting-ah hian Winter Festival chu lian leh ngelnghet zawka hman a, sorkar department hrang hrangte nen tha thawh khawm a, ‘Winter Capital of India’ ni thei tur khawpa hmalak dan tur ngaihtuah a ni a. Awmze nei leh lian zawka awareness campaign leh inzirtirna kalpui te, Chaltlang Tourist Lodge hmuna 4-star hotel aia hniam lo sak tur te, Swadesh Darshan-a project thar thehluh tur leh Tourism Calendar leh event hrang hrangte thlirho a ni. Tin, Department hnuaia thawktu awm mek leh mamawh belh dan te sawiho a ni bawk a ni.   

Tourism Department hnuaia hmasawnna ruhrel (infrastructure) project kalpui mek leh hmachhawpte meeting-ah hian chipchiar taka thlirho a ni a. Tun dinhmunah cheng vaibelchhe 660.63 man hu infrastructure project 17 kalpui mek a nih thu meeting-ah hian tarlan a ni. 

Meeting-a tarlan danin Tourism Department hnuaiah PM-JUGA leh Bana Kaih atangin Mizoram hmun hrang hrangah homestay 189 sak a ni dawn a. Homestay-te hi a sak phung leh rawng inang tlanga sak tum a ni ang.

Vawiina Review Meeting-ah hian Commissioner & Secretary Pu Vanlaldina Fanai, Joint Secretary Pi Lalsangpuii Hmar, Joint Director Pi Lalthakimi Pachuau leh Tourism Department officer hrang hrangte an tel a ni.