2616/2023-2024

Dated Serchhip, the 3rd November, 2023: Vawiin khan Serchhip District DEO Pu David Lalthantluanga, IAS, Serchhip DC leh Serchhip SP Pu MS Dawngkima te chuan thuthar lakhawmtute kawmin kan hma lawka MLA General Election lo awm tura Serchhip District inbuatsaih dan an hriattir.

Vote thlak ni atana ruahmanna: November ni 7, 2023, Thawhlehni hian vote thlak tan a lo ni dawn ta a. Vote thlak hun chhung hi zing dar 7 atanga tlai dar 4 thleng a ni ang. Polling Station zawng zawng hi wheelchair accessible a siam vek a ni. Vote thlak tur te tan EPIC ken tur a ni a. EPIC ken tur nei remchang lo te tan Aadhaar Card, MGNREGA Job card, bank emaw post office emaw atanga pek chhuah thlalak chuanna passbook, PAN Card, Driving license, Indian Passport, Labour Ministry pek chhuah Health Insurance Smart card te hmangin vote thlak theih a ni.

Silence Period: Vote thlak zawh fel hun bituk atanga chhiar leta darker 48 chhung hi silence period a ni a. Hei hi keini ah chuan November ni 5 (Sunday) tlai dar 4 a ni a. Hemi hnu lamah hian Candidate leh politician te bakah mimal tute mahin campaign phal a ni tawh lo. Electronic media ah te political advertisement tihchhuah theih a ni tawh lo a. Voter te rilru sukthlek kaihhruai thei thil reng reng, interview a ni emaw, debate a ni emaw, sawihona a ni emaw, eng chi mah tih chhuah phal a ni lo.

Exit Poll leh Opinion poll : Vote thlak tan darkar leh khar fel atanga darkar chanve inkarah exit poll siam phal a ni lo. Vote thlak zawh fel hun bituk atanga chhiar leta darker 48 chhung silence period ah opinion poll siam phal a ni lo. Heng hian media zawng zawng, social media (youtube, facebook etc) thlengin a huam vek a ni.

Home Voting: October ni 26 leh 27 khan tar kum 80 chunglam te leh PwD te chu an inah kal chilhin vote thlak tir an ni a. Team 7 ah inthenin Serchhip District chhung constituency pathumah official te an kal chhuak a, home voting hmang hian vote 168 a tla a ni. Vote tlak tamna ber chu 26-Serchhip niin vote 115 a tla a, 27-Tuikum ah vote 28 a tla a, 28-Hrangturzo ah vote 25 a tla a ni.

PWD leh senior citizens te tan transportation ruahman sak an ni dawn a. ELC volunteers ten kum upa leh PwD te hruai leh dah hna hi an thawk ang a. ELC unit awm remchan lohna ah chuan BLO ten pick up leh drop hi ruahmanna an siam ang. ELC te hian survey neiin transportation mamawh tur list an kawl vek tawh a. Transportation mamawh tur tan mahni bialtu BLO emaw ELC unit te hnenah in report zel theih a ni.

Electoral Roll chungchang: October ni 4 a final publication of Electoral Roll neih a nih hnuah continuous updation kalpui a ni a. Tunah chuan November ni 7 a kan inthlanna atana hman tur Electoral roll-a hi peihfel tak tak a lo ni ta a. He Roll thar bera a lan danin Serchhip Assembly Constituency pathumah General Electors 54,266 an awm a, an zinga 26312 hi mipa niin 27954 te hi hmeichhia an ni. Service voters 413 telin Serchhip District a voter awm zawng zawng zat chu 54,679 an ni. Final publication of e-roll, October ni 4 a tihchhuah ah khan General electors 54152 an awm a. Updation neih hnua voter punna hi Serchhip AC ah 38 niin, Tuikumah 28, Hrangturzo ah voter 48 in an pung a, belhkhawmin voter 114 in an pung a ni.

EVM Commissioning: General Observer Pu V.Sampath hovin October 27 khan Serchhip District chhunga Assembly Constituency pathum a hman tur Electronic Voting Machine (EVM) leh Voter-Verified Paper Audit Trail (VVPAT) commissioning neih a ni a. Serchhip District chhunga Assembly Constituency pathumah hian belhkhawmin Polling Station 88 a awm a. Heng Polling Station a thawn tur EVM leh VVPAT te hi a siamtu company ECIL atanga Engineer pali lo kal ten a that leh that loh an endik a. Candidate symbol te bel niin Polling Day a hman theih turin buatsaih fel a ni. Vote thlak nia hman tur EVM leh VVPAT te hi hman mai theih tura endik fel niin a hmantlak ngei a ni tih finfiah hnuah Strong Room ah dahluh leh vek a ni.

Unallocated reserve - EVM Control Unit 15, Ballot Unit 33 leh VVPAT 12 chu nimin khan first randomisation, second randomization leh commissioning tih fel a ni a. Heng te hi reserve unit vek niin vote thlak ni- ah chhe palh a awm thulha thlakna tur a ni. Assembly Constituency tin tan reserve Ballot Unit leh Control Unit hi 25% zel dah tur a ni a, VVPAT hi 35 % dah tur a ni thung a. Serchhip District hian heng mamawh te hi a nei kim tawh a ni.

Postal Ballot: Government Serchhip College-ah inthlan kaihhnawiha duty tur polling personnel training mek te tan postal ballot a vote thlakna tur siam a ni a. November ni 1 atangin DC Office ah facilitation centre hawn tan a ni bawk a. November ni 3, vawiin thleng hian DC office ah postal ballot hmanga vote thlakna hun hawn a ni. Naktuk November ni 4 hian Polling Party training Govt.Serchhip College ah neih a nih dawn avangin, postal ballot a vote thlakna hawnsak an ni bawk ang. Nimin thleng khan postal ballot hmanga vote thlak 497 an awm tawh a ni.

Essential Services Absentee Voters te tan 26- Serchhip Constituency ah DC Office ah Facilitation Centre siamin vote thlak na siam sak an ni a, 27-Tuikum Constituency tan Chhingchhip Middle School ah hawn niin 28-Hrangturzo tan E.Lungdar BDO office ah siam sak an ni bawk. Heng Facilitation Centre te hi naktuk November ni 4 thleng hawn a ni ang.

Polling Party Training: Polling Station a duty tur Presiding Officer, Assistant Presiding Officer leh Polling Officials te training chu kalpui mek a ni a. October ni 30 khan PRO leh APRO ten training neiin October ni 31 khan Polling Officers te an training a. November ni 1 ah BLO te tan training buatsaih niin November ni 3 ah Sector Officer te tan training buatsaih a ni. Inrinni hian polling party training hnuhnung neih leh a ni ang. Presiding Officer 107, Assitant Presiding Offcer 107 leh Polling Officer 214 an awm a ni.

Law and order: Serchhip District chhunga inthlannaa duty tur sipai zawng zawngte chuan an awmna hmun tura ruat an thleng kim tawh a. Heng sipai te hian duty hrang hrang an kalpui nghal a ni. MCC puan atangin flying squad leh static surveillance team ten regular taka duty in, police station te pawhin ngawrh takin phal loh thil tilui leh zuar emaw, ruihhlo phurh emaw a awm leh awm loh enfiah hna an thawk reng a. Inthlanna felfai leh thianghlim, ralmuang taka mipui ten an aiawh tur an thlan theihna turin venhimna lama inruahman lawkna engkim peihfel vek a ni tawh a ni.