2615/2023-2024

Aizawl the 3rd November, 2023 : Pachhunga University College chuan Mizo historian leh ziak mi langsar Pu B.Lalthangliana hnenah ‘Laisuih Award 2023’ an hlan.

PUC hian vawiin (3.11.2023) khan an College Auditorium-ah kum thum dana an hman thin Cultural Day cum Music Day an hmang a. He Day-in a kentel pawimawh tak pakhat, thu leh hla hmanga Mizo hnam insuihkhawmna kawnga mi thawhhlawkte hnena an pek \hin, ‘Laisuih Award 2023’ chu Pu B.Lalthangliana hnenah an hlan a ni.

Pu B. Lalthangliana hi kum 1943, June ni 16 khan South Khawbung khuaah a lo piang a, a pa chu Ringchina a ni. Khawbungah hian pawl 4 thleng a zir hman a, hemi hnu hian khaw chhak lamah an pem a, zirna chu a bul a\angin a \an \ha leh a ni.

Kum 1975-ah Mandalay University a\angin M.A (History) chu distinction-ah a pass ta a, kum 12 chhung zet Mandalay University-a History Department-ah a thawh hnuin kum 1986 khan Mizoramah a rawn haw leh a, Hrangbana College-ah leh Pachhunga University College-ah te lecturer hna a nghet lovin a thawk a, kum 1987 khan Hrangbana College-ah dah ngheh a ni ta a. Hrangbana College a\ang hian Associate Professor-in a pension ta a ni. Fapa 4 a nei a, hna \ha tak tak chelhin an puitling vek tawh a, tunah hian Chhinga Vengah a khawsa mek a ni.

Kum 1961 vel a\angin thu hi a ziak \an a, lehkhabu hi 64 a ziak tawh a, seminar paper 104 zet a ziak tawh bawk. A lehkhabu te hi Mizo tawng, Kawl tawng leh Sap tawng tea ziak a ni hlawm a. A lehkhabu tam ber hi Mizo history leh culture lam a ni ber a, literature lam lehkhabu pawh thahnem tak a ziak bawk. Lehkhabu a ziah bakah Mizo mi thiam hrang hrangte kut chhuak a lakhawm a, a bu-in a chhuah a. Ani zarah hian Mizo mi thiam tam tak kut chhuak kan hmuh theih phah a, Mizo literature tana a thawh hlawk hle a ni.

A lehkhabu ziah zinga hriat hlawh zualte chu – History of Mizo in Burma, Ka Lungkham, Mizo Nun Hlui Part I & II , History of Mizo Literature, Pi Pu Chhuahtlang, India, Burma & Bangladesh-a Mizo Chanchin leh Zoram Encyclopedia te an ni. A lehkhabu ziah pahnih - ‘Ka Lungkham’ (1989) tih leh ‘History of Mizo Literature’(1993) -te hi MAL Book of The Year atan thlan a ni tawh a, ‘Ka Lungkham’ tih phei chu MAL Book of The Year hmasa ber a ni nghe nghe bawk. Heng bakah hian chawimawina chi hrang hrang vawi sawm aia tam a dawng tawh a ni.

Heng a thuziak hrang hrang hmang hian Mizo hnam chanchin thuk takin a chhui fiah a. Mizoram sawrkarin Mizo chanchin zir turin China-ah an tir hial a ni. Pu B. Lalthangliana hian Mizo nih hlutna a hai chhuak a, a thuziak hmang hian khawvel hmun hrang hranga Zofate min phuar khawm a. Unau kan nihna a hai chhuak bawk a ni. Heng a hnathawh hrang hrang avang hian Pachhunga University College chuan ‘Laisuih Award 2023’ dawng turin a thlang ta a ni.

Laisuih Award hian sum fai Rs. 20,000 bakah Trophy leh Thuziak (citation) a keng tel a. He Award hi a dawngtu Pu B.Lalthangliana hnenah hian khuallian, PUC principal hlui Dr. Tawnenga chuan a hlan a ni.

Laisuih Award hi mi 3 in an lo dawng tawh a. Kum 2011 khan hla phuah thiam Pu V.Thangzama chuan a lo dawng tawh a, 2015 khan hla phuahthiam leh zaithiam Pu Lalnunmawia (Valtea) chuan a dawng a, 2018 khan Tahan lama Mizo Zaithiam, T-Melody band zaipu, Lalnunsanga hnenah hlan a lo ni tawh bawk a ni.