2788/2023-2024

Dated Serchhip, the 15th November, 2023: Vawiin khan Serchhip DC Pu David Lalthantluanga chuan a pisaa programme tawi buatsaihah Serchhip khawchhunga veng fai lawmman a sem a, lawmman pakhatna dawngtu hi Vengchung Village Council an ni.

Pu David Lalthantluanga chuan Swachta hi Seva hman chhungin faina lamah mipui leh sawrkar kan luang chhuak a, faina beihpui kan thlak a, hei hi faina hapta hman hun chhung chauh ni lo, kum leh khuaa kan kalphung ni se a duhawm hle ang, a ti. Fai inelna tha taka kalpui niin MJA ten tlawmngaih chhuahin a endik hna an thawk a, lawmman la thei tur khawpa hmalatute zawng zawng chungah lawmthu a sawi a. Mizoram chu State dang ngaihtuahin kan fai viau a, amaherawhchu, hmabak erawh kan la ngah hle tih hria a tan la thar turin kalkhawm te DC chuan a fuih a ni. Serchhip chu khawpui fai tak, bawlhhlawh hmuh tur pawh awm mang lo khawpa fai a ni a, khawtlang hruaitu VC te leh tlawmngai pawl te, mipui mimir te an fakawm hle, a ti a. Tifaitu ah kan tang thei lo a nih pawhin tibawlhhlawhtu ah tumah hi tang lo ila, kan khawtlang leh kan in leh a vel te a lo faiin a lo thianghlim leh zual thei ang tiin Pu David Lalthantluanga chuan Serchhip khawtlang mipuite a fuih a ni.

Swachhata hi Seva hi India ram pumah September ni 15 atanga October ni 2, Mahatma Gandhi piancham thleng khan hman a ni a. Thupuiah Garbage free India - bawlhhlawh awm lohna India tih chu thlan a ni. Serchhip ah pawh UD&PA hmalakna in faina beihpui thlak a ni a. He hapta hnih chhung hian Sesah kawr tihfai hna chu Govt. Serchhip College NSS ten an thawk a; DAY-NULM hnuaia SHG ten Serchhip khawpui chhunga vantlang inthiarna zawng zawng an tifai a; Brilliant Hr.Sec.School leh Presbyterian English School, New Serchhip ah te hman khat daih plastic hmang lo tur leh bawhhlawh thliar tura inzirtirna kalpui a ni a; Swachhata hi Seva pualin, Mizoram Cleanliness Week inbuatsaih nan Serchhip Town Area chhunga VC hrang hrangte tan fai inelna buatsaih a ni.

Serchhip MJA ten October ni 5 leh ni 6 khan a endik hna an thawk a. Village Council lawmman dawngtute chu hetiang a ni:-

Pakhatna - Vengchung VC (Rs. 20,000 leh citation)
Pahnihna - Chanmari VC (Rs. 10,000 leh citation)
Pathumna - Hmar Veng VC leh P&E Veng VC (Rs. 5000 leh citation)

Vawiin programme hi District Urban Development Officer Pu Gaston Vanlalhriatpuia’n a kaihruai a. Addl DC Pu Lalnundika, DIPRO Pi Lalnunmawii leh MJA aiaawh te an tel a ni.