2787/2023-2024

Aizawl, 14th November, 2023 : Lok Sabha MP Pu C. Lalrosanga chuan vawiin khan Aizawl Muanna Venga Thutak Nunpuitu Team (TNT) hmun tlawhin a fang kual.

Pu C. Lalrosanga chuan TNT hmunpuia nausen aṭanga puitling, pitar/putar thleng enkawl ngaite enkawl an nih dan leh an mamawhte a hmunah ngei hmuh puiin, TNT a rawngbawltute inpekna leh an hnathawhte ropui a tihzia thawktute chu a hrilh a. Pathian rinchhan a, rinna tak tak nena mi 1800 lai harsatna leh mamawh chi hrang hrang nei an enkawl dan chu fakawm a tihzia a sawi bawk.

Lok Sabha MP chuan TNT a inenkawlna in leh hmunhmate chu enkawl ngaite enkawlna atan a chep tawh hle tih a hmuhin a theih ang tawka ṭanpui a tum thu a sawi a. TNT Kalvari Hospital De Addiction Centre tihlen dan ngaihtuahpui a tum thu a sawi bawk.

Pu Rosanga hian TNT De addiction Centre tana MP Fund atanga lungrem a lo siam tir tawhte chu enin ṭha a tih thu a sawi a. Kum 2016 a ama hova din “Prayer for Myanmar” pawl hmingin TNT puala chhawmdawlna programme buatsaih an tum thu a sawi bawk a. Kumin Krismas leh Kumthar inkarah he hun hi buatsaih an tum a ni tih a sawi bawk.