2786/2023-2024

2023 Sahmulphah thla ni 14: Vawiin khan Kolasib District Election Officer Pu John LT Sanga hovin DC Conference Hall-ah Sector Officer-te, Flying Squad Team leh Static Surveillance Team leader-te chuan Kolasib District-a Mizoram Legislative Assembly Inthlanpui, 2023 buatsaih dan an thlir let.

Kolasib DEO Pu John LT Sanga chuan MLA Inthlanpui 2023-ah Kolasib District-ah felfai leh hlawhtling taka vote thlak zawh fel a ni chu lawmawm a tih thu sawiin, Pathian hruaina leh inthlan kaihhnawiha thawktu zawng zawngte theih tawpa ṭan tlanna vang a ni, a ti a. Mizoram People Forum (MPF), kohhran leh tlawmngai pawlte hma lakna leh election official-te an thawhpuina chu inthlan felfai chhan pakhat a ni tiin, hei hi India ram chhung hmun danga awm lo, Mizoram kan vanneihna a ni, a ti a. Review meeting chu inthlana duty-te'n an duty-naa an thil tawnte a sarhu laia an sawi ho nan leh, ṭha an tih zawng leh hmasawnna tura an rawtnate aṭanga nakin zel atan pawha ṭangkaipui theih tur leh inzirna tur a awm theih beiseia ruahman a nih thu a sawi.

He review meeting-ah hian DEO hi Returning Officer-te, Election Officer, Assistant Returning Officer-te leh DIPRO te'n ṭawiawmin, Kolasib District chhunga sector 16-a Sector Officer-te leh District chhunga assembly bial pathuma FST team 2 leh SST team 2 ṭheuh awma leader-te an tel a. Inthlan vuakveta an duty-naa an thil tawn hrang hrangte tar langin, hmasawnna tur rawtna hrang hrang an neihte chu an sawi ho a. District election office aṭanga bawhzui theihte leh thuneitu sang lama bawhzui ngai tur thil te pawh he hunah hian sawi ho a ni.