4044/2024-2025 

Dated Serchhip the 31^st January, 2025: Mizoram Journalists’ Association (MJA) Serchhip District chuan vawiin chawhnu khan Serchhip Press Club-ah Annual Conference an hmang a. Bawrhsap Pu Paul L. Khuma chu khuallian niin DIPRO Pi Lalnunmawii chu khualzahawm a ni. 

DC chuan journalist te fuihin tunlai khawvelah electronic device leh social media revolution a thleng a, he thil thar hi thinhrik mai loa hmang tangkai turin a chah a. Khawvel changkang zel mila inherrem thiam mi ni turin a fuih. Journalist te chu awn lam nei loa thuziak thin turin a chah a; a hun laia rihluai buaipui a, a laklawha tawpsan mai loin, an thuziah te a chhiartu mipui tan a tangkai zawkna turin a tawp thlenga chhuizui peih thin turin a chah a ni. Pu Paul L.Khuma chuan Serchhip District MJA te leh District Administration in thawhhona tha tak an nei chu lawmawm a tih thu leh, inzahtawn leh induhsaktawn takin tun thlengin an thawk ho nia a hriat thu a sawi a. An Annual Conference lawmpuinan thilpek a hlan nghal bawk a ni.  

Khual zahawm Pi Lalnunmawii pawhin information dik leh belhchiandawl pekchhuah chu Journalist te mawhphurhna a ni, a ti a. Mipui sawrkar democracy ah chuan ram hruaitute khalh ngiltu pawimawh tak an ni tih inhria a taima lehzual turin a fuih a ni.  

Serchhip Districy MJA Annual Conference hi Pu Kapliana Pachuau, Vice President chuan a kaihhruai a. Pu C.Lalhminghlua, President hnen atangin thusawi(Presidential Speech) ngaithlak a nih bakah tunhnaia an member Pension a chhuak ta Pu RC Hranghmingthanga (Zawlbuk Aw), Thenzawl thlahna thuziak a hlan nghal bawk a ni. 

Pu T Biakchamliana, Secretary, MJA(SD) leh Pu R Lalmuansanga Treasurer, MJA(SD) te hnen atangin report ngaihthlak a ni a. MJA General Headquarters, Aizawl atanga lo kal Pu C.Lalhmachhuana, Vice President pawhin thu a sawi a ni. 

Vawiin a Serchhip District MJA Annual Conference Session II-ah hmeichhia te dikna leh chanvo humhalh chungchangah 'Awareness Campaign' neih a ni a. Hemi zawh hian ro an rel chhunzawm a ni.