3354/2024-2025

Dated Serchhip, the 4^th December, 2024: Vawiin khan Serchhip Town Piggery Cooperative Society Ltd. Vawk Chaw Herna In leh Khawl, P&E Veng, Serchhipa mi chu Pi L.Lalzidingi, District Cooperative Officer (DCO) chuan a hawng.  

Pi Lalzidingi chuan Serchhip District chhungah Society 119 awmin chung atang chuan PMJVM Scheme hmang tangkaitu hi Society 24 an awm mek, a ti a. Serchhip Town Piggery C/S Ltd (Kawlri VDVK) chu he scheme hmangtu  zingah telin, 1st Installment chauh an la hmu chunga tun dinhmun an thleng thei hi hruaitute leh member te thawhhona tha tak vang a ni, a ti.  2nd Instalment hmuh thuai beisei a nih  thu Pi Lalzidingi chuan sawiin; chumi hunah chuan an mamawh dang pawh changtlung zawka inpek leh ngei pawh an tum tih a sawi a. Member-te lungrual tak leh Society dangte entawn tlaka hmalam pana ke pen zel turin a sawm nghal bawk a ni.

PMJVM Scheme hnuaia sum hi Sawrkar Laipui atangin zaah za hmuh a ni a. a scheme-in a tum ber chu ramhnuaia thei leh thlai atanga thar chhuah hlutna tipung a, mi rethei zawk ten man man zawka an hralhchhuah theihna tura an mamawh hmanraw pek a ni. 

Serchhip Town Piggery C/S Ltd. hi 27.10.2020 khan an ding tan a. Cooperation Department a register niin tun dinhmunah member 66 an awm mek a ni. Helai hmun hi LR,S&WC Department, Serchhip hnen atangin hun engemaw chhung atan Society te hian an hawh a. He vawk chaw herna khawl leh a ken tel te hi Pradhan Mantri Janjatiya Vikas Mission(PMJVM) Scheme hnuai atangin cheng nuai 5 senga lei a ni a, darkar 1 chhung in quintal 80 vel a her thei a ni. A in leh hmunhma sakna tur atan hian DRDO Serchhip hnen atangin NREGS hnuaiah cheng nuai 3  leh Bialtu MLA hnen atangin G.I.A. cheng nuai 3 an dawng a ni.