3355/2024-2025

Khawzawl, dated 4th December 2024: Vawiin chawhma dar 10 atang khan District Disaster Management Authority (DDMA) kaihhruaina hnuaiah leh National Disaster Response Force (NDRF) hovin Tuipui, Khawzawlah tuilian thlen thulha mihring chhanchhuah leh sawngbawl dan tur inzirna, Flood and Water Rescue Mock Drill neih a ni.

Tuilian hi ruah sur tam (torrential rain) avanga tuilian thut (flash flood) anga chan a ni a, he tuilian avang hian hliam leh thi awm anga chan a ni bawk a. DC Office atangin ralkhel dar (siren) dar 10-ah tihrik a ni a, Khawzawl DC leh DDMA Chairman ni bawk, Pu K. Vanlalthiana hovin District Emergency Operation Centre (DEOC) an thukhawm nghal a, DEOC kaihhruainain Staging Area siam a ni a, team hrang hrang - State Disaster Response Force (SDRF) te, Quick Response Team (QRT) te, medical team te, security team te an thleng khawm nghal a ni. Staging area a Incident Commander, Addl. DC Pu Lalfakzuala'n chhiatna thlen thu inhrilhhriatna hun a hmang a, team te hian chhiatna hmun an pan nghal a ni.

Tuilian thlenna hmunah hian SDC Pu Paul Rokima chu Incident Commander a ni a, a kaihhruainain mihring zawn leh chhanchhuah (search and rescue) hna thawh nghal a ni a. NDRF, SDRF leh QRT member te'n search and rescue hi an kalpui a, medical team te'n an ruang lak te leh mihring chhanchhuah te triaging, first aid leh CASEVAC tul angin an lo ti bawk a ni. District Hospital-ah hengho hi hruai an ni a, doctor leh nurse te'n tul angin an lo enkawl nghal bawk a ni. Tuilian thlenna hmun atang hian MPRO te puihna nen DEOC lam pawh chinchang hrilh reng an ni bawk a ni. A hmunah hian Chief Observer atana ruat SDO (Sadar), Pu Suvigya S. Chandra, IAS leh Observer dang Inspector Pi T. Lalnutluangi te chuan mock drill kal dan an enfiah bawk a ni.

He mock drill-ah hian inhliam te, mitthi te leh an chhungte anga lemchang turin office hrang hranga hnathawkte leh khawtlang mi te sawm an ni.

Mock drill zawh hian DC Meeting Hall-ah debriefing neih a ni a. Chief Observer Pu Suvigya S. Chandra chuan report a pe a, tihthat tawk leh tihthat tawk loh te a sawi a. NDRF leh thukhawm dang te'n an ngaihdan hrang hrang te an sawi ho bawk a ni. DDMA Chairman, Pu K. Vanlalthiana chuan hetiang inzirna hun tha tluang taka an  hmang thei chu lawmawm a tih thu a sawi a, ngaih pawimawh a, ngaih hlut a tul a tih thu sawiin a taka a thlen palh hlauh pawhin mock drill a tel zawng zawngte chu inring zawk leh thiam zawkin an tih tur te an tih theih ngei a beisei thu a sawi.