3356/2024-2025

Aizawl, the 4th December, 2024: Mizoram State Legislative Assembly Speaker Pu Lalbiakzama chuan vawiin chawhnu dar 2 khan Speaker Room, Treasury Square, Aizawlah ZORO buatsaih Zo Indigenous Identity Card a tlangzarh. 

Speaker Pu Lalbiakzama chuan UNO-in indigenous people-te a ngaihpawimawh thu leh zofate chu indigenous people-a a pawm tawh thu sawiin, hnam lian leh chak zawkte'n an awpbeh mek indigenous people-te chhanchhuah an nih theih nan UN Declaration on the Rights of People’s chu kum 2007 daih tawhah siam a ni a, he UNO thupuan hi kan hman tangkai thiam deuh deuh a tul a ni, a ti a. ZORO General Headquarters-in rem hre taka UN thupuan-UN Declaration on the Rights of People’s behchhana Zofa Indigenous Peole’s tana hman tur ‘Zo Indigenous Indentity Card’ an siam chu tha a tih thu sawiin, Zo Indigenous ID chu zofate'n dikna chanvo kan chan theih nana tangkai taka hman a nih ngei a beisei thu a sawi bawk. 

Pu Lalbiakzama chuan zofate chu British Sawrkar 'divide and rule policy' tuar nasa ber a nih thu sawiin, "Kan duh vang ni miah lovin ram bung thum India, Burma leh East Pakistan (Bangladesh) ahte thensawm kan ni a, India-ah phei chuan State pali Mizoram, Manipur, Tripura leh Assam-ahte thendarh kan ni", a ti a. Kan inunauna leh thisena kan inzawmna a bo chuan loh avangin kan indawmkana inchhawmdawl zel a tul tih sawiin, "Khawvel pum anga chhut pawha kan tlem em avangin inlungrual lo tham kan awm lova, kan inlungruala kan insuihkhawm lehzual a ngai a ni, a ti a. Zofate inkara remna palai hna thawk thintu ZORO hmalakna lawmawm a tih thu sawiin, zofate inkara inremna a awm theih nana hma la chhunzawm zel turin a chah a ni. 

He hun hi ZORO President Pu R. Sangkawia chuan kaihruaiin Dr. Lalrinawmi Ralte, ZORO General Secretary i/c Foreign Affairs-in hunserh a hmang a. Pu L. Ramdinliana Renthlei, ZORO General Secretary i/c Organisation-in Zo Indigenous Identity Card chungchang a sawifiah a. Pu Michael Lalthanmawia, ZORO Treasurer-in lawmthu sawiin hun hman a khar a ni.