3357/2024-2025

Saitual, the 4th December, 2024: Vawiin khan Samagra Shiksha: School Education Department, Saitual District buatsaihin District Higher Secondary School, Keifangah Bharatiya Bhasha Utsav (Indian Language Festival) 2024 lawm a ni a, thupui atan ‘Harmony in Language and Nature’ thlan a ni. 

He hunah hian Pu Micky Lalenkawla, DEO / DPC Samagra Shiksha, Saitual District chuan zirlai naupangte hmaah thusawiin Bharatiya Bhasha Utsav (Indian Language Festival) 2024 hman a nih chhan leh a tangkaina te a sawi a. DEO chuan India ram chhungah hian tawng chi hrang hrang a tam hle tih sawiin, heng zingah hian India rama tawng hman lar berte zinga mi Hindi leh English thiam a pawimawhin a hlu a ni, a ti.  India ram zau zawka kal hunah Hindi leh English thiam tangkaina a lang zual thin tih sawiin, hemi vang hian kan hnam tawng mai piah lamah Hindi leh English tawng thiam a pawimawh tih a sawi a. Zirlai naupangte chu Spoken Hindi leh Spoken English lama hmasawn tura tan la turin a chah nghal a ni.  

Pu Micky Lalenkawla chuan Mizo tawng hi tunlai thalai ten an hmang dik lo nasa thin hle tih a sawi a, hnam humhalh tur chuan kan tawng kan humhalh tlat a ngai a ni, a ti. DEO chuan kalkhawmte chu Mizo tawng hmang dik tur leh humhalh turin a chah bawk a ni. 

Bharatiya Bhasha Utsav (Indian Language Festival) 2024 hi India ram pum puiah kar khat chhung hman tur niin, Tamil poet leh freedom fighter Subramania Bharati piancham 11th December hriatreng nan hman thin a ni a. India rama tawng hrang hrang te inpumkhatna leh tawng hrang hranga India hausakna chawi nung a, mitinin tawng hrang hrangte inzahsak tawnna leh tawng inzirtir tawnna nei tura ruahman a ni.

December ni 11, 2024 thlenga Bharatiya Bhasha Utsav (Indian Language Festival) 2024 hman turah hian nitin thupui hrang hrang hmanga inzirtir tharna neih tura ruahman a ni a.   

Vawiina Bharatiya Bhasha Utsav (Indian Language Festival) 2024 hun hmannaah hian zirlai naupangte tan India rama State hrang hranga tawng hman inhriatsiakna – Quiz on Indian State Language neih a ni bawk.