3358/2024-2025

Dated Hnahthial the 4th December, 2024: Vawiin khan Hnahthial DC Meeting Hall-ah Bawrhsap, Pi Rita Lalnunmawii Pachuau kaihhruaiin Ruihhlo do beihpui chungchanga thutkhawmna - District Level Nasha Mukt Bharat Abhiyaan Committee chu neih a ni a. Hnahthial District chhunga ruihhlo do kawnga hmalak tawhna te thlir hona hun neih niin he campaign hnuaia hmalak zel dan turte sawi ho bawk a ni.

Thutkhawmnaah hian Ruihhlo do beihpui thlakna, Nasha Mukt Bharat Abhiyaan thawh khatna atana sum dawn zat leh chumi hmanga hmalak dante thlir hona neih niin ruihhlo do beihpui thlakna kawnga sum la mamawh zat leh a hman dan turte sawi hona neih a ni a. Ruihhlo do beihpui thlakna kawnga hmachhawpte sawiho niin hmalak zel dan tur kimchang zawka rel turin Addl. DC kaihhruai Sub-committee chu a rang thei ang bera thutkhawmna neih ni se ti a rel a ni. 

Thutkhawmna hian a hma a a lo rel thluk tawh, mipuiten ruihhlo dona kawnga an thil hriatte ziaka an thlak theihna tur bawm, Drop Box chu kalpui tan tawh ni se tiin a rel a. Drop box hi Hnahthial town chhungah pahnih awm tura tih niin Hnahthial District chhunga khaw dang zawngah chuan pakhat theuh awm tura tih a ni bawk. Drop box hi  YMA te kutah dah tur niin mi nawlpui hawn theih loh turin kalh that tlat a ni ang.

He hunah hian Ruihhlo do beihpui thlakna puala intihsiakna pahnih - Chanchinbu Editorial-a Ruihhlo do chungchang chhuah tha ber leh Ruihhlo do chungchanga Short Film insiamsiak lawmman dawngtu turte thlanna neih nghal a ni a. Ruihhlo do chungchang, chanchinbu Editorial-a chhuah tha ber lawmman dawngtute chu :-

1st prize - Calathea chanchinbu, Editor : F. Zosangliana 

2nd Prize - Kailawn chanchinbu, Editor : VL Liansanga

3rd Prize - Hnahthial Times, Editor : H. Lalthanghuta

Ruihhlo do beihpui thlakna a 'Short Film for WhatsApp status' intihsiakna lawmman dawngtute chu :-

1st Prize - Andrew Lalfakawma

2nd Prize - Maruata Boitlung

3rd Prize - TC Lalmuanthanga

Heng intihsiakna lawmman chu tiang hi a ni: Pakhatna - Rs 5000; Pahnihna - Rs 3000; Pathumna - Rs. 2000.

Intihsiakna lawmman hi December ni 13-ah  Excise & Narcotics Minister, Pu Lalnghinglova Hmar chuan DC Conference Hall-ah a sem tura ruahman a ni.

Thutkhawmnaah hian Pu Zothanmawia Khiangte, Addl DC; Pi Esther Leihang, SDO Sadar; Pu Lalhmangaihhlua, Addl SP; Dr. R. Lalsanglura, CMO; Pi LT Rose Mary Hnamte, CDPO; Pu R. Vanlalruata, SDC; Pu F. Lalrinfela, DIPRO; Pu K. Lalsangluaia, Principal rtd; Pu F. Lalsangzuala, FRO rtd; Pu Nohro Chhuatlo, UDC, DEO; Pu Lalthanpuia, Field Facilitator, DSWO; Pu F. Zosangliana, MJA President leh Pu Hmingthanzuala, YMA Sub Hqrs President te chu an tel a ni.