1682/2026-2027

Serchhip, the 6^th August, 2026: Vawiin khan Serchhip  District bawrhsap Pu Paul L. Khuma hovin Serchhip leh Thenzawl inkar kawngpui, Kawlni Filling Station, Sailiamkawn thlanga leimin chungchang ngaihtuahin PWD hotute, Urban Infraprojects Pvt. Ltd. leh khawtlang hruaitu YMA hotute an thukhawm a, a rang lama hmalak dan turte rel a ni.

Niminpiah (4.8.2026) khan District Administration chuan Additional Deputy Commissioner Pi Dorothy Muansangi hovin enfiahna an nei a, hemi bawhzui hian vawiin khan meeting hi neih a ni a; he lai leimin hi ruahtui a tlak reng avang leh, lei a la chet reng avangin, thenfai vek theih a ni rih lova. Tun dinhmunah PWD ten lai zauvin, koh theihin (on-call) an vil reng a. Naktuk atangin kawng ko hniam lai, motor tan theihna laiah Boulder phah tura hma lak tan nghal a ni dawn a ni. 

Vawiina DC Pu Paul L. Khuma hova meeting chuan, khualpangzin mai bakah, damlo mipui nunau zin veivakte himna thil, Public Interest a nih avangin PWD leh Serchhip khaw chhunga kawngpui siam that hna thawktu Urban Infraprojects Pvt. Ltd. te chu  a rang thei ang bera bawhzui turin a ngen a, an hmalakna huam chhung a ni lo chungin, meetinga ngenna angin Urban Infraprojects Pvt. Ltd. te hian naktuk atangin boulder phah hna hi an thawk tan nghal dawn a, PWD ten lei laih zauh bakah leimin awmna bul hnai kawng nal, motor tan theihna laite pawh an ti fai nghal bawk dawn a ni. Kawnga phah tur Boulder cubic meter 30 hi Urban Infraprojects Pvt. Ltd. te hian an tum anga, a tul anga PWD ten tum belhin kawng thawm that hna hi thawh a ni dawn a ni.

District Bawrhsap chuan helai kawng hi kawngpui pawimawh tak a nih avangin mipuite himna leh muanna a pawimawh thu sawi a, PWD leh Contractor-te chu theihtawp chhuah tura fuihin, khawtlang hruaitute pawh thahnemngai taka hnathawhte vilpui turin a chah bawk. 

Harsatna neite tan phone number 9863042812 ah hian engtik lai pawhin biak theih reng a ni.