2568/2026-2027 

Dated Serchhip, the 8^th October, 2026: Vawiin khan Serchhip Deputy Commissioner Office-a Officer leh Staff zawng zawngte tan 'emPOWERu' kaltlangin ni hnih awh training "Ignite Your Potential" chu Pisapui Hall-ah a hawnna neih a ni a, training hawnna hun hi Additional Deputy Commissioner Pi Dorothy Muansangi'n kaihruaiin Bawrhsap Pu Paul L. Khuma'n hun a hmanpui a, Resource Person atan Pi Golda Dell Zohmangaihi hman a ni.

Bawrhsap Paul L. Khuma chuan he training buatsaih a nih chhan sawiin sawrkar hna thawkte, hna tha tinreng thawk tura kim taka inthuama kan awm theihna tur te, office dawrtute tana biak nuam leh thawh hlawk kan nih theih nan te, kum upa tawhte pawh intuaithar reng tur kan ni tih inhriat thar leh nante a ni tih a sawi a. He training atanga an zir chhuahte chu office mai piah lamah, pawn lamah pawh mi dangte hnena hlan chhawng zel turin duhsakna a hlan bawk.

He training hi October ni 8 leh ni 9  chhunga neih tur a ni a. Vawiinah hian Leadership Skills, Stress Management, Ethics & Values leh Personal Effectiveness te zir a ni a. Naktuk-ah Cross Cultural Sensitization, Service Excellence, Problem Solving & Decision Making leh Team Building Activity te zir chhunzawm a ni ang.