2569/2026-2027

Aizawl dated 8th October 2026: Vawiin khan Commerce, Industries, Geology & Mining Department bultumin Mizorama tuialthei verhna kawnga hmalakna hrang hrang kalpui dan thlirletna hun,'Review Meeting on Oil Exploration in Mizoram' neih a ni a. Dr. H.Lianzela, IAS, Secretary, CIG & M Department chuan hun kaihruaiin Ministry of Petroleum and Natural Gas atangin Shri Sohban Pathak, Additional Director General (Exp.), Directorate General of Hydrocarbons, Oil and Natural Gas Corporation Limited, Oil India Limited leh Indraprastha Gas Grid Limited hotute an tel a ni.

Hun kaihruaitu Dr. H.Lianzela, IAS, Secretary chuan Mizoram chhunga lei hnuai hausakna lak chhuahna tura tunhma a hmalakna hrang hrangte chuan beisei angin hlawhtlinna la hmu lo mahse, Ministry of Petroleum and Natural Gas, OIL, ONGC leh Mizoram Sawrkar hnuaia Commerce, Industries, Geology & Mining Department-te thawhhona leh tanrualna zarah hmachhawp duhawm tak a awma a hriat thu a sawi a. Thiamna thar, khawl thar leh inpekna thar nen vawiin thlirletna hun chu hmang turin kalkhawmte a chah bakah, Mizoram leh India hmarchhak State-te tana innghahna tham hmasawnna thlen thei tur hmachhawp ruahmanna siam tum theih turin a chah bawk a ni.

Vawiin thutkhawmah hian Er. Lalremmawia, Joint Director, Directorate of Geology & Mining chuan 'Sharing Findings from Field Inspection and status of Hydrocarbons Activities in Mizoram' tih thupui hmangin presentation a pe a. ONGC leh OIL atangin 'Indentification of Prospective Acreages for Future OALP Bid Rounds' tih leh IGGL atangin 'Updated Gas Infrastructure and Monetization Opportunities' tih thupui hmangin Presentation ngaihthlak a ni bawk.

Tarlan danin Mizoramah hian kum 2011 khan ONGC chuan lei verh hna hi a lo kalpui tawh a. Tun dinhmunah ONGC hian Meidum leh Zanlawn  ah Oil Well an verh tawh a, OIL hian Aibawk, Keifang leh Thenzawlahte hma an la tawh bawk a ni. Hortoki khaw bula lei verhna ah hna kalpuina tura lirthei lian kal thei turin Chhimluangte Bridge thawmthat a ni thu te,  a bik takin ONGC in kum 2011 -12 a Hortoki, Kolasib District-a Gas an lo hmuh tawhna hmun atanga 2 km a hlaah Exploratory Well thar an verh belhlehna tur atana regularisation leh ONGC block no. AA-ONN-2001/2 extension-a nih theihna dan tur sawiho a ni a. Mizoram chhim lam, Rabung leh Tlabung lam ah leh Palzawng - Thiltlangahte  'Gas Exploration' kalpui a pawimawh thu te leh Panisagar - Sihhmui Gas pipeline kalpuina tura hmachhawpte sawi ho a ni a. Pi H. Lalchhandami, Joint Secretary, CIG&M chuan lawmthu sawiin hun a khar a ni.