2570/2026-2027

Kolasib, 8th October, 2026: Vawiin khan DC Office Chamber, Kolasib-ah District Election Officer (DEO) leh Kolasib Bawrhsap ni bawk, Pu H. Dolianbuaia kaihhruaiin Kolasib District chhunga vote nei thei, electoral roll-a hming la chuang lo  leh kumtling thar (first-time/young electors) te thun luh an nih theihna tura 'Special Drive' kalpui mek chungchangah chanchinbumite nen Press Briefing neih a ni.

He hunah hian Bawrhsap chuan he Special Drive pawimawhna hi sawiin, "Khua leh tui dik tak, vote nei thei chin tu mah electoral roll atanga hmaih an nih lohna turin theih tawp chhuah a ni dawn a. Hemi atan hian mipuiten kan nihna dik tak pho chhuak a, dan anga vote nei thei ngei kan nih chuan ngaipawimawh a sorkar hmalaknate lo thawhpui turin kan inngen a ni," a ti.

District Election Office, Kolasib in October ni 8 atanga October ni 31, 2026 chhunga Special Drive a kalpui dan tur tlangpui chu hetiang hi a ni:

Special Drive chhung hian Booth Level Officers (BLOs) ten pre (Draft) SIR Electoral Roll leh tun (Final) Electoral Roll khaikhinin, pre (draft) SIR roll-a hming chuang tawh, mahse tun Final Electoral Roll-a hming chuang lo (left-out) te chu zawng chhuakin list an siam ang.

Heng mite dinhmun hrechiang tur hian BLO-te chuan in tinah kalin (House-to-House visit) an enfiah ang a, enroll tlak an nih chuan Form-6 fill-up danah an pui ang. BLO-te hian kar khatah elector 20 atanga 25 tal tlawh tumin, tun thla chhungin he hna hi zawh fel an tum dawn a ni. Form-6 fill-up tawh te pawh list-ah hian chiang taka tarlan a ni ang.

House-to-House visit an neih lai hian kumtling thar vote nei thei (young electors) awmte zawng chhuakin, India khua leh tui dik tak an nih chuan Form-6 hmanga electoral roll-a thun luh an nih theih nan an pui nghal bawk ang.

BLO-te chuan an list siam hi an awmna part theuha recognised Political Parties-a Booth Level Agent (BLA) te hnenah an sem ang.

Form-6 application thehluh tawh leh Field Verification Report te chu ERO hnenah thehluh a ni ang a. Heng case-te chungchangah hian Representation of the People Act, 1950 leh Registration of Electors Rules, 1960 in a sawi dan angin ERO chu thutlukna siamtu (deciding authority) ber a ni ang.

A remchan dan angin Booth Level Camps pawh buatsaih thin a ni ang a, tah hian electoral roll-a inthun luh dilnate leh Form-6 chungchangah puihna pek thin a ni ang.

District Election Office, Kolasib chuan mipuite chu he Special Drive hun hi hmang tangkai a, BLO-te lo thawhpui tha tur leh House-to-House visit leh Booth Level Camp te hmang tangkai turin a ngen a ni. "No Voter to be Left Behind" tih thupui tipuitling turin mipuite tawiawmna an ngen a ni.

Harsatna leh hriatfiah loh neite chuan a hnuaia ERO te hi biak pawh theih reng an ni:

 * ERO, 4-Tuirial (ST) A/C - Pi Dr. Doris Lalrinawmi (Phn. No. 9903635376)

 * ERO, 5-Kolasib (ST) A/C - Pi Lalvenhimi Ralte (Phn. No. 8974761551)

 * ERO, 6-Serlui (ST) A/C - Pu Samuel Lamalsawma Sailo (Phn. No. 9615715731)