2749/2025-2026

Dated Aizawl the 22nd December, 2025: India rama sawrkar damdawi in ṭha bik tehna, National Quality Assurance Standards (NQAS)-ah Serchhip District Hospital leh HWC-Primary Health Centre pahnih – Zawlnuam PHC leh Thingsai PHC te an tling thar a, heti hian Mizoram chhunga District Hospital 9 leh HWC-PHC 57 target awm zinga 45-in National-level NQAS certificate an nei tawh a ni.

Dr. Lily Chhakchhuak, Mission Director, National Health Mission, Health & Family Welfare Department chuan NQAS national-level endiknaa tling thar Serchhip DH hian a tehnaah 93.73% hmuin, Zawlnuam PHC leh Thingsai PHC te hian a tehnaah 92.63% leh 91.60% te an hmu tih a sawi a ni.

NQAS bakah hian India ram pum huapa nau neihna hmun ṭha bik tehna, LaQshya-ah Serchhip DH chhunga department pahnih Maternity OT leh Labour Room chuan certificate nei tharin, a tehnaah 94.95% leh 94.12% te hmuin Platinum Badge an dawng a ni.

Heti hian Mizoram chhunga Sawrkar damdawi in 60 te’n NQAS national-level certificate an nei mek a. Tunah hian sawrkar damdawi in 13 leh HWC Sub-Centre 42-in state-level NQAS certificate nei tawhin national-level-a endikna tur an dil mek a ni.

National Quality Assurance Standards (NQAS) leh LaQshya certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor (endiktu) an lo kal ṭhin a ni. Hetah hian a tehnaa 70% an hmuh tlin chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte’n an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihhawmna leh a chhehvel vawnfai kawngah te, environment vawn ṭhat kawngah te, khawtlang nena an thawhhonaah te endik an ni.

Mission Director Dr. Lily Chhakchhuak chuan India rama damdawi in ṭha tehnaa tling thei tura thawktu State Quality Assurance Unit te, District Quality Assurance Unit, DQM leh DHQM te, Serchhip, Hnahthial leh Mamit District-a Sr. CMO leh Staff zawng zawng te, Dr. ZD Lalmuanawma, District Medical Superintendent, Serchhip DIstrict, Dr. Lalmuankima, MO, Zawlnuam PHC leh Dr. Lalrinchhani, MO, Thingsai PHC leh an thawhpui Nurse leh staff zawng zawng te, khawtlanga an thawhpui RKS/JAS Chairman leh member zawng zawng te, an bial chhunga ASHA zawng zawng te thawhrimna chu fakawm a tiin lawmthu a sawi a.  Heng NQAS certified sawrkar damdawi in kan neih takte hi mipuite’n ṭangkai taka an hman a duhsak a, mipuite pawh ṭangkai taka hmang turin a chah bawk.