Vawiin hian kum 2016 chhunga vawk natna chi khat porcine reproductive and respiratory syndrome (PRRS) vanga Serchhip District chhunga vawk chan, chhungkaw 107 te hnena Mizoram sawrkarin a ralna hlanna programme, P&E Veng YMA Hall ah hman a ni a. Pi Sangchhin Chinzah, Serchhip Bawrsap chu khuallian niin ralna sum hi a dawngtu turte hnenah a hlan.

Pi Sangchhin Chinzah chuan, PRRS vanga kum 2016 chhunga vawk thi, in report zawng zawngte ral nachang hria AH & Vety Department te an fakawma a hriat thu a sawi a. Kan ranvulhte hi eng ran pawh nise chhungkaw member anga kan en thin te an ni a, an thih an bovin kan rilru a na thin a ni. Chung thil hrethiam sawrkar, ranvulhtute hmakhaw ngaitu kan neih avangin kan vannei em em a; heti khawpa sawrkarin min puih si chuan, nasa zawka intodelh zo ngei tura ran kan vulh sauh sauh a ngai a ni, a ti. Bawrhsap hian, PRRS natna hi ram dang ran kan chawkluh atanga kan neih a ni a, ran vulh lama kan intodelh loh vanga kan tawrh natna a ni. Hei vang hian ran vulhtute tan hmalakna tur tam tak, chona lian tak a awm reng a ni, a ti a. Ralna dawngtu chhungkaw 107 te a lawmpui thu a sawi bawk a ni. Bawrhsap hian a dawngtu mi sawm te hnenah ralna sum hi a hlan a, midangte chu AH & Vety, Serchhip a thawktuten an pe chhunzawm a ni.

Dr. R. Lalmakthanga, Chief Vety Officer chuan ralna sem chhuah dan report a pe a; District chhung khaw pakua (9) atanga kum 2016 chhunga PRRS natna avanga vawk chan chhungkaw 107 te vawk hloh zat chu 507 a nih thu a tarlang a. An zinga 260 hi a note niin, 103 chu a thanglai an ni a, a dang 144 chu a puitling sa tawh te an ni. A noteleh a thanglaite hi sawrkar hian Rs. 500 theuhva ralin, a puitling hi Rs. 1000 in a ral a. Serchhip District chhunga ralna a pek zawng zawng hi Rs. 3,25,500.00 a ni.

Ralna dawngtute aiawha thusawitu Pu Vanlalruata chuan, kan rante an han thih palh hian thenawm khawvengte tan chuan eng nilo mah se, a neitute chuan mittui nen kan sun fo thin a ni. Tin, mi tam takin eizawn nan kan hman avangin kan tan chuan chhiatna a tling bawk. Chutiang dinhmun a ding kan nih hriaa sawrkar in ralna min han pet lat mai hi a makin a ropui kan ti a, a thlamuan thlak hle a ni, a ti.

He hunah hian Serchhip Joint VC President Pu PC Siamliana leh Serchhip DIPRO Pu K. Saitluanga te pawhin thusawina hun an hmang bawk.

Inkhawm kaihruaitu Dr. Lalnghinglova, DVO chuan, kum 2013 ah Mizoramah PRRS natna a lo langa, 2014 leh 2015 ah a reh deuh va, 2016 ah a rawn nasa ta viau a, chhungkaw tam takin an vawk an chan a, kum 2017 ah hi chuan Champhai District ah sawi deuh a awm a. Mahse a nasa lutuk lo niin kan hria, tiin PRRS kan tawrh dan tlangpui a sawifiah a. Tuna vawkthi sawrkarin a ral te hi kum 2016 kuma thi, an hnena report te an nih thu leh NLUP leh tanpuina dang atanga vawk neitute chauh nilova PRRS avanga vawk thi hrim hrim te an nih thu a tarlang bawk.