Nimin chhun khan Mizoram State Tobacco Control Society bul tumin Serchhip District CMO Conference Hall-ah "Sensitization Workshop for Enforcement Officials, Serchhip District" neih a ni a, Serchhip District Bawrhsap Pu H. Darzika'n khuallian niin a hmanpui.

Khualllian Pu H. Darzika chuan Serchhip District in vaihlo zuk leh a kaihhnawih chungchanga record duhawmlo tak a nei thin chu pawi a tih thu a sawi a, he hmingchhiatna hi ngaithutak a, a ti tawp tura tan la turin sawrkar Department hrang hrang hotu kalkhawmte chu a chah a, workshop a zirtirna an dawn te chu an thawhna office theuhah te, anmahni in theuhah te uar taka thehdarh turin a chah nghal bawk a ni.

Nimina Sensitization Workshop hi Pu Lalhmangaiha Chawngthu, Member, Anti-Tobacco Squad-in a kaihruai a, Department hrang hrang hotu kalkhawmte hnenah hian Dr. Malsawma, CMO chuan vaihlo in mihring taksaa nghawng tha lo a neih dan chi hrang hrang zirtirna a pe a, Nl.Vanlalzari, District Coordinator, Mizoram State Tobacco Control Society pawhin vaihlo leh a kaihhnawih chungchanga sawrkar dan dinglai chi hrang hrang zirtirna pe in, puipunna hmun hrang hranga meizuk khap a nih thu te, kum 18 hnuai lam hnenah leh zirna in atanga feet 300 bialah vaihlo leh a kaihhnawih reng reng zawrh leh hralh khap tlat a nih thu te leh puipunna hmun reng reng ah "No Smoking" signage leh "Complaint Board" te tar a tul thute a sawi a, dan bawhchhetute hrem an nih theih dan te pawh sawi lang nghal bawk a ni.

MSTCS hian vaihlo chungchang Workshop hi tun thla chhungin vawi thum neiin thuthar thehdarhtute puala buatsaih a nih bakah tlawmngai pawl hrang hrangte  puala buatsaih a lo ni tawh a, Serchhip-in zuk leh hmuam do kawnga hma a sawn theih nan tan lak an tum nasa hle a ni.