3995/2024-2025

Dated Serchhip the 28^th January, 2025: Serchhip District-a VC Inthlanpui lo awm tur chungchangah District Election Officer Pu Paul L.Khuma, Serchhip DC chuan vawiin khan DC Meeting Hall-ah chanchinbu mite a kawm. 

Serchhip DC chuan Serchhip District-ah inthlanna muanawm taka kalpui a lo ni tawh thin a, mipui awm zat atanga chhuta vote tla zat pawh a sang ber pawl a ni thin a, tun tum VC Inthlanpuiah Mizoram puma vote tlak thatna ber District nih tumin voter turn out target ah 90% tlin ngei tumin tan i la ang u, a ti a. Serchhipa thuthar thehdarhtute leh mipui zawng zawng te thawhhopuiah a sawm a ni. 

DC chuan tun tum VC inthlan chuh tum hming pe 698 zingah General Seat chuh tu mi 524 awmin 174 te chuan reserved seat an chuh a; heng candidate zawng zawngte hian endikna paltlang vekin candidate tura pawm an nih hnuah an zinga mi 11 te chu an inhnukdawk tih a sawi a. Chuhtu awm loa tlinga puan mi 7 awmin chung te chu: 

1) Lalhriatkimi (ZPM), Hmunzawl

2) Lalthazuali (ZPM), Neihloh

3) Dawngzela (ZPM), Chhuanthar Tlangnuam

4) Huntharnundila (ZPM), Chhuanthar Tlangnuam

5) B.Lalrinnunga (ZPM), Chhuanthar Tlangnuam

6) H.Lalmalsawma (ZPM), Chhuanthar Tlangnuam

7) Nuntharnghakzeli (ZPM), Chhuanthar Tlangnuam 

Inhnukdawkte leh tlinga puan an awm tak avang hian tun tuma VC inthlanpuia chuh tum zat hi 698 atangin 680 ah an tlahniam ta a ni. 

District Election Office inbuatsaih dan sawiin DC chuan Presiding Officer, Polling Officer leh Returning Officer te tan January 30 leh February 6 ah training buatsaih a ni dawn a, Returning Officer tan hian January 16 ah training vawikhat buatsaih a ni tawh, a ti a. Sector Officer a ruat ten Polling Station an tlawhchhuak mek a, hmun danga an tih ve loh Serchhip District ah hian Flying Squad 11 din a ni, a ti. 

Sawrkar hnathawk election duty tura ruat - Persons on Election Duty (PED) te tan vote thlak dan tur ruahmanna siam niin Form 21 hmangin DEO hnenah dilna thehluh tur a ni a. District pawna vote neite chuan dilna hi February ni 1 thleng an thehlut thei a nga, District chhunga vote neite hian February ni 8 thleng an thehlut thei ang. District pawna vote nei te hian February ni 6 ah vote an thlak a nga, district chhunga vote nei te chuan February ni 6 atanga February ni 8 thleng vote an thlak ang.  

State Election Commission in hun a hawnsak angin Electoral roll hi nimin thleng khan tihdanglam a la ni a. VC Election atana final roll ah hian voter 50,594 awmin hei hi Final Electoral Roll aiin 151 a pung a ni. Election Officer Pi F Lalnisai chuan electoral roll thar ber hi SEC ah  thehluh a nih tawh thu leh a copy hi party tinah pek an ni dawn tih a sawi bawk.  

Vawiin press briefing-ah hian Additional SP Pu Saidingliana Sailo chuan venhimna chungchanga an hmalakna leh inpuahchahna a sawi a. Police Headquarters lamah police an dil belh thu te, Guidelines in a sawi piah lamah Quick Response Team an din thu leh duty pawh ruat tura bi tuk zat aia tam an ruat thu a sawi a. Inthlanpui hmachhawn turin an inpeih fel tawh tih vawiin meeting-ah hian a sawi a ni.