3009/2023-2024

Dated Serchhip, the 12^th December, 2023: Vawiin khan Serchhip DC Pu David Lalthantluanga hovin Serchhip District a Viksit Bharat Sankalp Yatra kalpui dan tur rel a ni a, he hunah hian Serchhip District chhunga Sawrkar Laipui scheme kalpuitu Department te an tel a ni.

Ram leh mipui te hmasawnna turin Sawrkar laipui chuan State Sawrkar te kaltlangin scheme hrang hrang a kalpui mek a. Heng scheme a kalpui te hi a tak taka chhawrtu tur leh tangkaipui ber tur mipui mimirin chiang zawka an hriat a, anmahni leh an chhungkaw tana tangkai taka an hman ve ngei theihna tura mahni tawng ngeia inzirtir leh inhrilhriat hi Sawrkar Laipui chuan a ngai pawimawh hle a. Viksit Bharat Sankalp Yatra hi November 15, 2023 atang khan Central Sawrkar chuan kalpui tanin State tinah kalpui mek a ni tawh a. Mizoram leh State dang pali, inthlan hmachhawn te tan erawh hun pawhfan sak an ni a. Mizoram State hian December ni 14, 2023 hian State level-ah hawn leh kalpui tan a tum a ni.

Viksit Bharat Sankalp Yatra atan hian Serchhip District ah Van pakhat tirh a ni ang a. December ni 18, 2023 atanga zin chhuak tanin Serchhip District chhung khaw hrang hrang a fang a nga. Heng khuaah te hian function buatsaihin Sawrkar Official te leh scheme kaihhnawiha mi pawimawh ten mipui zirtirna hun an hmang thin dawn a ni. Vawiin DC hoa meeting hian ruahmanna duangin December ni 18, 2023 atanga tanin January 26, 2024 thleng he Van hi a zin kual dawn a ni.

Serchhip Distritct Viksit Bharat Sankalp Yatra Nodal Officer atan Pi Rebecca Laldinmawii Hrahsel, SDO (Sadar) chu ruat a ni a. Block level ah nodal officer atan Serchhip BDO leh East Lungdar BDO te ruat an ni a. Central Scheme kalpui tu department tin ten an department atangin a khawihtu tur bik Officer an inruat theuh dawn bawk a ni. Village level ah committee din tur tih a nih angin Block level Nodal Officer te kaihhruaiin Village Level Committee hi din a ni bawk ang.