3010/2023-2024

Champhai the 12^th December, 2023 – Khawbung Zone Football Association buatsaih Khawbung Zone Football Championship vawi 4-na, December ni 13 atanga ni 16 chhunga neih tur chu nizan dar 7 khan Champhai Bawrhsap Pu James Lalrinchhana chuan Bungzung Community Hall-ah a Kick Off a ni.

Khawbung Zone Football Championship-ah hian Team 8 chhuakin Bungzung atangin team 2 leh Khuangthing, Zawlsei, Dungtlang, Khawbung, Leithum, leh Zawngtetui atangin team 1 theuh an tel a ni.

Kick Off program Pu CS. Zodinsanga. Vice President, Khawbung Zone Football Association kaihhruaiah Pu James Lalrinchhana chuan thu sawiin, Champhai District huamchhungah Sports discipline hrang hrang hnuaiah Association chak tak tak dingin, thalaite tan program leh intihsiakna hlu tak an buatsaih thin chu lawmawm a tih thu a sawi a. Champhai District-ah hmasawnna daih rei leh tlo nei turin zirna, faina leh hriselna lama hmasawn chu thil pawimawh hmasa berte zing ami a ni tiin, naupang leh thalai kalkhawmte chu ruihhlo laka fihlim tlat tur leh an zirna te ngai pawimawha taima leh tumruh taka zir thin turin a chah a. Khawbung Zone Football Championship chuan thalaite rilru leh taksa hriselna kawngah te leh khawtlang mipuite inlungrualna kawngah te nghawng tha tak a neih ngei a beisei thu sawiin kalkhawmte chu hun hlimawm leh hlawkthlak tak hmang theuh turin duhsakna a hlan a ni.

Khawbung Zone Football Championship Kick Off ah hian hun hlimawm tak hman niin, Tv Samuel Lalrinsanga. Honorary Secy Khawbung Zone Football Association chuan Report a pe a, Khawtlang hruaitute, Champhai District Sports Association, Zone FA Technical Board te atagin thusawi ngaihthlak niin, team Jersey te khuh hawnna hun hman a ni bawk a ni.