No.3271/2019-2020

Kan hriat theuh angin Covid-19 hrileng laka mipuite kan him tlan theih nan Mizoram sawrkar chuan nasa takin hma a la reng a. Serchhip District ah pawh hmalakna hi kalpui zel niin hnathawktuten chawl lovin an kalpui mek a ni.

Hmalakna pawimawh tak pakhat chu sawrkar thupek anga ram pawn leh state pawn atanga rawn lut te mahni remchan dan anga ni 14 chhung inkhung hran a ni a. Tunah hian Serchhip District-ah hetianga khung hran mek hi 194 awmin, Isolate ngai kan la nei lova. Invenna pawimawh tak a ni tih hriaa sawrkar thuzawm inkhung hrang zawng zawng te chungah lawmthu kan sawi a ni.

Serchhip District chhungah mahni in lama inkhung hranna nei lo te tan hetiang hian inkhung hranna siam a ni a, Serchhip bikah: Tourist Lodge, Agriculture Rest House, Govt. Serchhip College Boys Hostel, P&E Rest House, Eklavya Model Residential School te ruahman a ni a, Thenzawlah te, E. Lungdarah te, N. Vanlaiphaiah te leh Khawlailungah te ruahman a ni bawk. District chhung khaw dangah pawh a tul angin chawp leh chilha ruahmanna siam mai theih a ni. Serchhip a Quarantine na tur hmun thlan chhuahte viltu tur Management Team pawh din niin, vawiin lamah briefing an nei nghe nghe a ni. Tin quarantine na hmunah hian dah luh an awm chuan Police Department ten uluk takin an veng nghal zel bawk.

Tin, inkhung hrangte zingah Covid-19 natna lo lang chhuak an awm palha a dah hran lehna tur pawh Serchhip Tarpi Tlanga, SIRD, Panchayati Resource Centre ah engkim fel taka ruahmanna siam a ni a. An inkhung hranna atanga he Isolation Ward a phurh thlenna tur lirthei te, hmanrua mamawh te pawh ruahman fel vek tawh niin a phur thlengtu tur Ambulance te pawhin Drill te neiin an tichhin tawh hlawm a ni.

Lock Down hi tha taka kan zawm a pawimawh avangin Security enforcement pawh khauh tawk taka kalpui reng a ni a, khawpui chhung hmun hrang hrangah Village Level Task Force aiawhte leh Police Department tangkawp te an duty vek a, Village Level Task Force te phalna nei lo chuan mipui pawn chhuah a rem lova, sawrkar hnathawk office a kal te pawh ID keng vek tura tih an ni.

Hetihlai hian chhuanchham an awm palh thuta invenna tur ruahmanna pawh tha taka siam a ni a, bialtu MLA Pu Lalduhoma pawhin Serchhip khawpui chhunga Village Level Task Force 10 te hnenah chhuanchham tumah an awm loh nan tiin Rs. 10000 theuh a hlan a ni.

Harsatna lo thleng palh lo bawhzui nghal zel thei turin District Task Force Member te chu engtiklai pawha inring rengin an awm mek a, mipuite thuawih taka mahni inlama inkhung hram hram turin kan inngen nawn leh a ni e.