3589/2023-2024

Dated Serchhip, the 31st January, 2024: National Highway-54 laihzauh leh siamthat hna thawh mekah Serchhip District chhunga zangnadawmna la tawh, mahni In la thiat lo te chu vawiin khan Executive Magistrate te kaihhruaina hnuaiah endik niin chenna in, in sak lai, green house leh sawrkar ram lak china bungraw chhawpchhuah te an thianfai a ni.

Serchhip DC Pu David Lalthantluanga, Competent Authority for Land Acquisition (CALA) hova January ni 29 (Thawhtanni)-a an lo rel tawh bawhzuiin vawiin khan Executive Magistrate pali Pu HD Lalpekmawia, Pu Gaston Vanlalhriatpuia, Pu Daniel Sailo leh Pu Lalhruailiana Zote te kaihhruaiin Khumtung, Chhingchhip, Chhiahtlang leh Baktawng khuaah Eviction Team te hi an chhuak a. Zangnadawmna sum a pumhlum a la tawh si, in la thiat duh lo mi tlem te chu District Administration chuan an chungah khawng taka hma la in, an In hmun lo ram te dan anga thiatin an senghawi sak ta a ni.

NH-54 kawngpui laih mekah Serchhip District huam chhunga sawrkarin ram a lak fel tawh, dan anga zangnadawmna - compensation leh Rehabilitation and Resettlement sum leh pai dawng tawh te zingah in leh lo thiat duh lo lui te hi kum 2023 July leh August thla khan Magistrate ten an inah ngei kal chilhin an in te thiat tura thupek eviction notice pek an nih bakah ni 22 November, 2023 khan Serchhip DC Pu David Lalthantluanga, Competent Authority for Land Acquisition (CALA) chuan a hmunah tlawhin an thiah loh chhan te a endik bawk a. Eviction Drive thawhkhatna hi November 28, 2023 khan neih niin in pakhat thiah a lo ni tawh a ni.

Heng khaw li (4) ah te hian chhungkaw engemawzat chuan an In hi an thiah mek avangin thiah sak ngai lova lo thiat chhunzawm zel tura hriattir nghal an ni a. Hetihlai hian la thiat ve lo in engemawzat chu sawrkarin ram a lak tawh Right of Way (ROW) chinah chhinchhiahin, khawl hmangin thiah sak an ni.

Vawiin-a In thiahna ah hian Serchhip atangin Police thahnem tak kalin kawngpui enkawltu NHIDCL leh Contractor te bakah khawtlang hruaitute an tel bawk a, buaina leh harsatna awm lova hmalak niin IPC Section 188 hmangin thubuai siamsak an ni dawn a. District thuneitute chuan zangnadawmna la tawh, mahni In la thiat lo te chungah dan angin hma an la chhunzawm zel dawn a ni.