No.3321/2019-2020

Vawiin Serchhip Task Force Committee on Covid-19 te chu an Chairman Pu H. Dolianbuaia, MCS, DC hovin an thukhawm a. Serchhip District ah tun dinhmunah khung hran mek 220, dah hran (Isolate) mek 4 leh Positive Case nei an la awm loh thu report a ni.


Committee hian thu pawimawh tak tak engemawzat a rela, chungte chu.

1.      Quarantine te leh Isolate te hi a viltu tur medical staff (doctor) nitina lo bia a, an harsatna te sutkian puitu tur ruat an ni.

2.      Khaw bila lo inkharkhip leh uchuak taka lo khauh fal rem a ti lova, essential commodity phur lirthei lo dan te, khaw paltlang lo khap te, loneitute feh tur lo dan te a rem ti lo.

3.      Committee ah hian DCSO Pu C. Zadailova chuan report pein, tun hnaia sawrkar in buhfai a thlawna a sem turte chu Allotment order sign vek tawh a ni a, retailer te lakchhuah theih, a thente tana sem theihin a awm tawh a ni, a ti.

4.      State Level ah Supply Chain Management Committee siam a ni dawn.

5.      Serchhip leh district chhunga thlai thartute thlai thar tha taka tihral a nih theih nan Vegetable Supply Chain Programme ruahman a ni dawn a, mawhphurtute inruat an ni.

6.      Oil & Petroleum Serchhip District dinhmun a la thaa ngaih a ni a, Gas pawh tluang taka phurh a nih zel theih nan hmalak a ni ang.

7.      Thuneitu sang (state authority) atangin Serchhip District-a a tul apianga hman tur pawisa Rs. 7.3 Lakh dawn a ni a, a tangkai thei ang bera hman tura rel a ni.

8.      Local/Village Level duty ten Forest Deptt Service thenkhat leh Ah & Vety Service thenkhat te chu Essential Service a ni tih lo hre tur leh an hnathawh lo dang lo tura hriattir an ni.

9.      Serchhip khawpui hmun pawimawh zual lai disinfect spray tura ruahmanna siam a ni.

10.     Essential Commodity phurtute chu an motor-ah Magistrate Seal chuang lehkha bel sak leh Driver te ID siam sak theih a ni a, a mamawh chuan District Magistrate Office ah ngaihven tur a ni. Serchhip District paltlang duh emaw lirthei movement permit mamawh te tan pawh lak theih reng a ni.

11.     Essential Commodity phurtute hi khawiah mah lo dan emaw lo tihkhawtlai phal a ni lo.

12.     District Committee chuan Serchhip Bialtu MLA, Pu Lalduhoma chungah lawmthu a sawi a. MLA hian Serchhip chhung VC tinte chu chhuanchham an awm palha an lo inven nan Rs. 10000 theuh a pe tawha, tunah hian hriselna lama thawktute (frontline workers) te hman tur Glove leh mamawh dang te a rawn pe leh dawn a ni.

13.     Serchhip leh district chhung khaw danga theihtawp chhuaha mipuiten an nghei loh nana tha thawhtu sumdawng te chungah lawmthu a sawi a. Nunphung a pangai zel theih nana theih tawp chhuah zel tur leh; chutihruala Social Distancing lo ngai pawimawha, lo fimkhur theuh turin a ngen a ni.

14.     Village Level Task Force tin te chungah lawmthu a sawi a, chutihlaiin a huhova awm khawm lo zawng a duty lo insiam tur leh, inchhawka mi pahnih khat zel lo duty tum turin a ngen a. Kum upa lam, kum 40 leh a chunglam chu duty ah hian lo awl thei turin a beisei a ni.

15.     District Task Force member te, Medical team te, Police leh Information te leh sawrkar hnathawk engemawzatin chhun zan zawmin hna an thawk reng a, heng hnathawkte tei vel te lo hmumawh lo tur leh a tul ang zela lo tanpui zawk turin Village Task Force te chu ngen leh hriattir an ni.

16.     Mizoram a positive case pakhat awm leh; chumi kal zelin a ken tel a kaihhnawih inchhuichhuah kawngah District Task Force chu rang tak leh fel takin a che a, khami kaihhnawih avanga inkhung hran ngai zawng zawng dap chhuakin rang takin a khung nghal vek a ni. Mipuite tan chiaina tur engmah a awm lova, kan him theih nan mahni theuh lo inkhunga, inveng theuh turin kan inngen nawn leh a ni.