No.3320/2019-2020

Novel Coronavirus (COVID-19) hri leng mek a darh zel loh nana India ram puma March ni 25 - April ni 14, 2020 thleng (ni 21 chhung) inkharkhip (complete lockdown) tur chungchanga Chawngte Sub-Division hnuaia inbuatsaihna enpuiin vawiin khan Lawngtlai Bawrhsap Pi Shashanka Ala, IAS chuan Chawngte a tlawh a. State sawrkar hnuaia official te, Chakma Autonomous District Council official te, sipai lam leh bank lam te, khawtlang hruaitute leh tlawmngai pawl hruaitute meeting a neihpui.

Bawrhsap hi Lawngtlai DIPRO Pu C. Lalhruaitluanga'n tawiawmin, CADC Conference Hall-ah Chawngte SDO (Civil) Pu S. Kaptluanga hovin sub-divisional level task force member-te'n an lo dawngsawng a. Meeting neih chhunzawm nghal niin, COVID-19 dona kawnga Chawngte Sub-Division hnuaia hma lakna kal mek te sawi ho a ni a. Member-te'n an dinhmun leh harsatna an tawhte a hnenah hian thlenin, Bawrhsap hian inkharkhip chhunga hma lak dan tur hrang hrang ruahmanna siampuiin, COVID-19 hri leng laka mipui an him theih nan official leh task force member-te chu tih tak zeta hna thawk turin a chah.

Bawrhsap chuan, Chawngte RD Block huam chhunga Incident Commander atan Pu S. Kaptluanga ruat a nih thu leh COVID-19 hri leng a darh loh nana hma lakna reng reng chu a kaihhruaina hnuaiah department leh tualchhunga hma latu zawng zawngte'n an kalpui a tul thu a sawi a. Department hrang hrang leh mipuite paw'n an theih china a tha ber chhuah theuh turin a chah bawk.

Inkharkhip chhunga tih tur leh tih loh tur hrang hrang tar lan niin, hemi chhunga mipuiin ei leh bar leh an ni tin mamawh an tlakchham loh nan ruahmanna siam a ni a. Veng tinah khawsak harsa zual zawn chhuah a, chhuanchhama an awm loh nana tanpuina pek chungchangah village level task force-te'n mawh phur se, tih a ni a. Retailer tinah April thla chanpual (quota) pek a, mipuia sem tura Bawrhsapin ruahmanna a siam chu sawi lan niin, khawsak harsa zualte'n a thlawna an dawn theih nana hma lak mek a nih thu pawh tar lan a ni. Anganwadi hrang hranga ei tur chhek khawlte a zat hriat fel a, mipuia sem dan tur ngaihtuah tum a ni bawk.

He inkharkhip chhung hian ei leh bar leh hriselna lam bakah, tui, kawlphetha, inbiak pawhna, thianghlimna leh dan leh thupek ken kawh kawngah harsatna a awm loh nan a kaihhnawih department te chu theih tawp chhuah tura ngen an ni a. Mipuite paw'n sawrkar thu an zawm zel theih nan village level task force-te chu khauh taka hma la turin ngen an ni.

Thut khawm zawh hian Bawrhsap chuan Chawngte Community Health Centre-a COVID-19 vei an awm thulha dah hranna tur pindan (isolation ward) an buatsaih chu a en a. Pindan buatsaih saah hian khum 8 dah theih tur niin, Bawrhsap chuan rikrum thila buaina a awm loh nan damdawi in thuneitute chu hmun remchang dang ngaihtuah belh turin a hrilh. He'ng bakah hian mahni in lama inkhung hran ngai, inkhung hranna tur hmun nei si lote dahna tur quarantine centre khum 50 vel awm theihna tur pawh ngaihtuah fel tawh a ni.