2032/2024-2025

Dated Serchhip, the 12^th September, 2024 : Vawiin atanga tanin Serchhip District chhungah  Mizoram Society for Social Audit and Transparency (MSSAT) hnuaia Social Audit Unit te chuan an Director Pi C.Laltleipuii hoin social audit an nei a. Serchhip District chhunga khaw 18 thlang chhuakin September 24 thleng audit hi an kalpui dawn a ni.

Pi C.Laltleipuii leh a team te hian vawiin khan New Serchhip, Darnam leh Dinthar Veng te an tlawh a. Heng veng palia tlawmngai pawl YMA, MHIP, MUP leh a dangte nen audit hi neih a ni. 

July 29, 2024 khan Rural Development Secretary hovin Mizoram chhunga ni 100 inhlawhna MGNREGA hnuaia thingtlang mi te leh mi harsa zawkte tana hamthatnate leh hmasawnna tur thil dang pawimawh te sawi ho niin, hma an lo lak tawh dan te thlirletna leh an hmachhawpte sawiho a ni a. Hemi bawhzui hian social audit kalpui niin mipuiten MGNREGA hnathawh dan leh tangkai dan te zau zawka an hriat theih nan tlawmngai pawl te leh chanchinbumite he audit ah hian an tel a ni. 

Rural Development Department hnuaia hnathawh hrang hrangte langtlang tak leh mipui tan chhawrnahawm lehzuala kalpui a nih theih nan Social Audit Unit te hian MGNREGA, PMAY-G, NSAP etc. hnuaia hnathawh te an endik thin a. Vantlang rorel (Gram Sabha) kaltlangin an hnathawhte chu kum khatah vawihnih Audit thin niin hei hi dik tak leh langtlang taka hnathawh a nih zel theihna tura hmalakna a ni. 

Vawiina tanga tan social audit neih mekah hian mipui rorelna Gram Sabha koh niin mipui te hnenah an dikna chanvo leh hna kalpui dan te hriattir an ni a, hriatloh avanga hamthatna dawng thei tur ni si lo dawng lo palh te hnenah hriattir an ni a, mipuiten lungawi lohna an neih te leh zawhfiah duh an neih te zawhfiahna hun hawn a ni. 

Serchhip khawpui chhunga social audit neih mekah hian Serchhip BDO Pi F. Lalnisai leh official dangte bakah Village Council member te, tlawmngai pawl hruaitute leh mipuite an tel a ni.