No.3617/2021-2022
Dated Aizawl, the 10th January, 2022: Vawiin hian Serchhip District Disaster Management Authority te chu sawm bik mi pawimawh dangte nen DC Meeting Hall ah an thukhawm a. Serchhip District a Covid19 hrikai pung chak lutuk dolet dan turte leh Serchhip khawpui chhunga dawr inhawn chhawk chungchangte an rel.

He hunah hian Chairman Pu Kumar Abhishek, IAS chuan, Serchhip District a nitin test zat atanga Covid19 punna rate chu za zela sawmthum zet a tling a. Aizawl district dawta case tamna ber kan ni mek bawk a, tun ang renga kan pun chhoh chuan reiloteah Aizawl district hi kan lehpel dawn a ni. Heti taka hri kai kan pun chhan hi hunpui laia Covid19 laka himna dan (Covid19 Appropriate Behaviour) kan zawm that tawk loh vang a ni ber a, kan dinhmunin chhiat lam a pan zel loh nan mipuiten himna dante tha taka kan zawma, khauh taka dan kan kenkawh a tul a ni, a ti. Kan himna tur dante mipuiten kan zawm tha thei ta lo a nih chuan hmalak lehna tur awm chhun chu Lockdown a nih mai hmel tawh a ni, tiin himna dante tha taka mipuiten kan zawm a tul tak zet tih a tarlang a ni.

Meeting hian, Serchhip khawpui chhunga dawrte inhawn chhawk tir ai chuan CAB khauh taka kengkawh chunga nitin dan pangaiin inhawn tha zawkin an hria a. Hei hi dawr inhawn chhawkah dawr inhawng chhunah mipui an lut khawm nasa zawk nia bazar leh a chhehvel VLTF aiawhte leh sumdawng pawl aiawhten an hmuh vang a ni ber. Chuvang chuan khauh taka CAB kenkawh a, CAB zawm thalo dawrte chu kar hnih chhung khar sak mai zawk ni se tiin an rel a ni. Dawr neitute chuan anmahni dawrtuten Mask tha taka hreng chung leh kut sil/ sanitized ngei chauhvin indawrna an neih pui thin tur a ni a, dawrtu leh dawr neituten CAB an zawm leh zawm lohvah dawr neituten mawh an phur dawn a ni.

Khawi hmunah pawh mipuiten CAB an zawm that theih nan Incident Commander te chu tun aia hma la nasa zual tura beisei an ni a, Police Department chu ngaihhnathiamna tel lova dan kengkawh (Zero Tolerance) tura beisei niin, VLTF te pawh intuaithara anmahni huam chhungah khauh taka hma lo la thar leh tura beisei an ni. Kohhran hrang hrangte pawh CAB zawm tha tura beisei tharleh an ni bawk. Tin, mahnia inenkawl dam tum test pawh nei duhlo, inthup an awm nia sawi chungchangah mahnia inenkawl dam tumten vanduaina leh harsatna khirhkhan zawk an tawk nasa tih medical lamin an tarlang a, test neih thuaia doctorte enkawlna hnuaia luh thuai a him ber tih mipuiten hre tlang turin an ngen a ni. Vaccine la duhlo, hri kaiten an tuar nain an dinhmun a him lo bik hle a ni tih finfiahnate pawh sawi chhuah a ni.

Tunah hian Serchhip District ah hri kai 946 an awm mek a, kumin kumthar ni sawm chhung mai hian Covid19 hri kai hmuh chhuah tam ber ni hi tum thum ngawt a thleng chho a. Tunah hian khaw sawm leh pakhatte chu hmun khuahkhirh bikah puan mek an ni bawk.