308/2024-2025
Dated Serchhip, the 19th April, 2024: Vawiin khan 1-Mizoram (ST) Parliamentary Constituency hnuaiah 26- Serchhip, 27-Tuikum leh 28-Hrangturzo segment ah te vote thlak chu tluang taka neih zawh niin tlai lam dar 5:00pm thlenga vote thlak zat chhinchhiah chin chu za zela 59.06 a ni. Polling Party te hian an duty hmun atangin Serchhip DEO office an pan mek a. Vote tlak dan kimchang hi zanin vek hian hriat theih nghal beisei a ni.
Election Commission of India in ruahmanna a siam angin vawiin hian zing dar 7:00am atanga tlai dar 5:00pm inkarah Polling Station 88-ah mipuiten vote an thlak a, tlai dar 5-a vote tla zat chhinchhiah District Election Officer in a puan danin vote hi 32,005 a tla a ni. Serchhip District chhung Constituency 3 a vote awm zat atanga chhutin vote tla zat hi za zela 59.06 a ni. Serchhip District ah hian vote 54193 a awm a. An zinga 27948 hi hmeichhia niin a dang 26245 te hi mipa an ni. Service Voters hi 414 an awm a, Service voters chhiar tela Serchhip District a voters awm zat chu 54,607 an ni.
26-Serchhip Assembly Segment ah tlai dar 5 thleng khan 59.22% a tla a, 27-Tuikum ah 61.37%, 28-Hrangturzo ah 56.51% a tla a ni.
Polling Station 88 zingah za zela chhutin 31-Vanchengte Polling Station ah vote tla tha berin za zela 80% a tla a, 12-Buhkangkawn Polling Station chuan dawtin za zela 79.05% a tla a ni. E.Lungdar-I (43.22%) ah vote a tla tlem ber a, N.Vanlaiphai IV (46.19%) vote tla tlem pahnihna a ni.
Vote thlak hun zawh veleh Polling Party te hian District Election Office a Receiving Counter an pan nghal a, Receiving Counter a chin fel ngaite an tih fel zawhah, Electronic Voting Machine, VVPAT leh an bungraw pawimawhte hi venhimna tha tak hnuaiah Presiding Officer ten Strong Room ah an dahlut a ni. Strong Room hi Security thuah thuma ven reng a ni a, CCTV tha taka vil a ni bawk.
Serchhip District ah hian Polling Station 88 awmin heng zingah hian hmeichhe hlang enkawl Women Managed Polling Station 3 (New Serchhip 3, Chhiahtlang 3 leh Chekawn); Youth Managed Polling Station 1 (Serchhip 6) leh Model Polling Station 3 (Thenzawl 3, Chhingchhip 1 leh East Lungdar 1) te an awm.
Serchhip District chhungah vote thlak zinga upa ber chu R Siamliana (Kum 95), E lungdar-II leh Pu V.Rokhuma,Kum 95, Keitum II te an ni a. Hmeichhia a upa ber chu Pi Thangliani (kum 94), Baktawng II a ni.
Vawiin nileng khan Serchhip District chhunga Polling Station tinah MPF te an duty a. District Election Office, Serchhip chuan MPF, Serchhip District Forum hnenah vote thlak ni-a Serchhip District chhunga polling station zawng zawng a MPF duty te thingpui in nan Rs. 43,000 a hlan a ni.
