307/2024-2025 

Kolasib dated 19th April 2024: Lok Sabha MP Election chu tukin dar 7 atang khan kalpui tan niin Kolasib a 4-Tuirial, 5-Kolasib leh 6-Serlui Assembly Segment-a Polling Station 89 ah te tluang takin vote thlakna kalpui a ni a. Tlai dar 5 thleng khan chhinchhiah theih chin ah vote za zel ah 57.7 a tla tawh a ni.

Pu John LT Sanga, Deputy Commissioner chuan inthlanna ralmuang leh felfai tak kalpui a nih theih nana Election branch a thawktute, department hrang hrang atang a inthlan buaipui tur a ruat te, khawtlang leh tlawmngai pawl te inpekna ah lawmthu a sawi a. India danpuiin kan aiawh thlang chhuak tur a duhthlanna chanvo hmang chhuak tur a vote thlak zawng zawngte chung ah lawmthu a sawi bawk a ni.

4-Tuirial Assembly Segment-ah hian za zel ah vote 57.9 a tla a, 5-Kolasib Assembly Segment-ah vote 53.44% leh 6-Serlui Assembly Segment-ah vote 60.17% a tla bawk a ni. 4-Tuirial Assembly segment-ah hian voter 18,433 awmin Polling Station 26 a awm a, 5-Kolasib Assembly segment-ah voter 24,102 awmin Polling Station 29-a awm a, 6-Serlui Assembly segment-ah voter 21284 awmin Polling Station 34-a awm bawk a ni. Home voting hmang a vote thlak, PwD voter leh Essential Service voter 176 leh Election Duty Certificate hmang a vote thlak dilna 1205 pekchhuah a ni.

Polling Station 89 zingah hian hmeichhe vil Polling Station 10, thalai vil bik Polling Station 1 leh ruah tui khawl pawimawh zia pho lang thei tur a chei, Unique Polling Station 1 siam a ni a, he Unique Polling Station-ah hian intlar ngai lova vote thlak theih turin ruahmanna siam a ni.